Azərbaycan, Bakı, 01 iyul / Trend / Azərbaycan İnvestisiya Şirkəti (AİŞ), Azərbaycan İxrac və İnvestisiyaların Təşviqi Fondu (AZPROMO), həmçinin şirə istehsalçıları "Milk Pro" və "SAF" MMC şirə istehsalı üzrə "Azeri Fruit Co" birgə Səhmdar Cəmiyyətin yaradılmasına dair niyyət memorandumu imzalayıblar.
Birgə müəssisə meyvə şirələrinin satışı və istehsalının əlavə olaraq inkişaf etdirilməsi, ixracın genişləndirilməsi və beynəlxalq standartların tətbiqi üçün yaradılır.
İmzalanan memoranduma əsasən, "Azeri Fruit Co."nun yaradılması üçün "Milk Pro" və "SAF" MMC-nin aktivləri birləşdiriləcək, AİŞ və AZPROMO isə birgə istehsalda sərmayəni təmin edəcək.
AİŞ biznes-planın hazırlanmasından sonra sərmayələr barədə qərar qəbul edəcək.
Şirkət xarici portfel və strateji sərmayələrin cəlb edilməsini təşkil etmək, korporativ idarəçiliyin qabaqcıl standartlarının tətbiqinə yardım göstərmək niyyətindədir.