Azərbaycan, Bakı,30 iyul / Trend , müxbir K. Zərbalıyeva/ Çərşənbə günü 2 saylı Bakı Yerli İqtisad Məhkəməsində vaxtilə "Azerneftyag" Bakı Neft Emalı Zavodunun (ARDNŞ - ə daxildir) ərazisi olan sahədə fəaliyyət göstərən 19 kommersiya müəssisənin Dövlət Əmlakının İdarə Edilməsi Üzrə Dövlət Komitəsinə, Bakı şəhər İcra Hakimiyyətinə, "KAT LTD" MMC-yə, "ADEC" Azərbaycan İnkişaf Şirkətinə qarşı şikayətinə baxılıb.
Bakı şəhər İcra Hakimiyyətinin 7 iyun 2006 - cı və 11 iyun 2007-ci il tarixli sərəncamları ilə, şirkətlərin icarəsində olan əmlakın və onların öz vəsaitləri hesabına tikdikləri qeyri-yaşayış sahələrinin yerləşdiyi torpaq sahələri "KAT LTD" MMC-yə "ADEC" Azərbaycan İnkişaf Şirkətinə ayrılıb.Şikayətçilər həmin sərəncamların ləğvini, icarəyə götürülmüş dövlət əmlakının özəlləşdirilməsi və onun həmin sahəsində şirkətlər tərəfindən tikilmiş daşınmaz əmlaka mülkiyyət hüququnu təsdiq edən şəhadətnamələrin verilməsini tələb edir.
Şirkətlər iddia ərizələrində göstəriblər ki, onlar, qanunvericiliyə uyğun olaraq, əvvəllər dövlət müəssisələrin istifadəsində olan, qeyri-yaşayış sahələrini icarəyə götürüblər. İcarəyə götürülən sahələr baxımsızlıq ucbatından yararsız vəziyyətə düşdüyündən, icarəyə verənin razılığı ilə həmin qeyri-yaşayış sahələri sahibkarlar tərəfindən öz vəsaitləri hesabına əsaslı təmir etdirilib və əksər qeyri-yaşayış sahələri, demək olar ki, yenidən tikilib.
Qeyri-yaşayış sahələrinin yerləşdiyi torpaq sahələrində həmin şirkətlər tərəfindən yeni inzibati binalar və istehsal yönümlü tikililər, anbarlar və s. tikilib.Ərizəçi şirkətlər 20 ilə yaxın müddətdir ki, icarəyə götürdükləri sahələrdən istifadə edirlər. Bu müddət ərzində müxtəlif təyinatlı istehsal sahələri yaradılıb, həmin istehsalat sahələrində 600-dən çox işçi çalışıb və hazırda da bu işl davam etdirilir.
Ərizəçi şirkətlər 10 il fəaliyyət göstərdikdən sonra, 1998-ci ildə özəlləşmə ilə əlaqədar müxtəlif aidiyyəti təşkilatlara müraciət ediblər. Lakin şirkətlərin şikayətlərində bildrilir ki, indiki ərizəçilər də daxil olmaqla, 39 müəssisə Dövlət Əmlak Komitəsinin sərəncamına verilib.
Ərizəçi şirkətlər öz sahibkarlıq fəaliyyətlərini genişləndirmək məqsədi ilə uzun müddət icarələrində olan, dövlətə məxsus qeyri-yaşayış sahələrini özəlləşdirmək və öz vəsaitləri hesabına dövlət torpaqlarında tikdikləri qeyri-yaşayış sahələri mülkiyyət hüquqlarını təsdiq edən şəhadətnamənin verilməsi üçün, Dövlət Əmlakının İdarə Edilməsi üzrə Dövlət Komitəsinə müraciət ediblər. Dövlət Əmlakının İdarə Edilməsi üzrə Dövlət Komitəsi şirkətlərin qanuni tələblərini təmin etməkdən boyun qaçırıb.
Verilmiş qarşılıqlı iddia tələbinin müzakirəsi avqustun 21-də keçiriləcək iclasda müəyyənləşdiriləcək.
Azərbaycan Əmlakın İdarə Edilməsi üzrə Dövlət Komitəsindən dərhal şərh götürmək mümkün olmayıb.
Müəlliflə əlaqə saxlamaq üçün elektron ünvan: capital
