Azərbaycan, Bakı, 02 avqust/ Trend , müxbir İ.Xəlilova/ Azərbaycanın Beynəlxalq Bankı (ABB) Nyu-Yorkda nümayəndəliyinin açılmasına dair ABŞ-ın Federal Ehtiyat Sistemi Direktorlar Şurasının icazəsini alıb. ABB-nin mətbuat xidmətinin rəhbəri Rauf Ağayev şənbə günü bildirib ki, proses bu günlərdə bankın nümayəndəlik ofisinin təqdim edilmiş ərazidə yerləşdirilməsinə dair Nyu-York meriyasının icazəsi alındıqdan sonra başlayacaq.
Onun sözlərinə görə, Birləşmiş Ştatlarda nümayəndəliyin qeydiyyatı üzrə məsələ bir il davam edib ki, bu da böyük uğurdur. Belə ki, MDB-nin əksər ölkələri bu vaxt kəsiyində icazə ala bilmirlər.
Hazırda bank məsələləri üzrə Nyu-York ştatı Departamentindən müvafiq icazə sənədlərinin alınması gözlənilir və bundan sonra nümayəndəlik rəsmi olaraq fəaliyyətə başlaya bilər.
Nyu-York ofisini nəzərə almaqla, ABB-nin ölkə xaricindəki ofislərinin sayı dördə çatacaq. Bu gün Frankfurt (Almaniya) və London (Böyük Britaniya) nümayəndəlikləri, həmçinin bir müddət əvvəl Lüksemburqda fəaliyyətə başlayan ofis aktiv fəaliyyət göstərir. Bundan əlavə, bankın Dubaydakı (BƏƏ) nümayəndəliyinin qeydiyyatı üzrə işlər başa çatır.
ABB-nin Nyu-Yorkdakı nümayəndəliyinin bankın Bakıdakı baş ofisi və ABŞ-dakı tərəfdaş maliyyə institutları arasında vasitəçi kimi çıxış edəcəyi, bankın ABŞ-dakı mövcud müştərilərinin maraqlarını müdafiə edəcəyi və yeni müştərilər cəlb edəcəyi, ABŞ-dan Azərbaycana sərmayələrin cəlb edilməsinə səbəb olacağı, həmçinin Amerika və Azərbaycanın işgüzar dairələri arasında qarşılıqlı faydalı münasibətlərin qurulmasına yardım edəcəyi planlaşdırılır.
Avqustun 2-nə olan cari məzənnə - 0,8093 AZN/USD.
Müəlliflə əlaqə saxlamaq üçün elektron ünvan: [email protected]
