Azərbaycan, Bakı, 02 avqust/ Trend / Azərbaycanın Səhiyyə Nazirliyi iyulun sonunda Bakı yaxınlığındakı Keşlə qəsəbəsi ərazisində kanalizasiya kollektorunda baş verən qəza ilə əlaqədar sanitar-təmizləmə işləri aparır. Nazirliyin məlumatında bildirilir ki, ilk günlərdən epidemioloq həkimlər qrupu əhali arasında sudan istifadə və ümumi sanitar-epidemioloji qaydalar haqqında maarifləndirmə işləri həyata keçirib. Ərazinin dezinfeksiyası aparılıb.
Qəsəbə ərazisindən keçən su xətlərinin çirklənməsi ehtimalına görə su kəmərləri ilə gələn su ciddi nəzarət altındadır. Hər gün laboratoriya analizləri üçün nümunələr götürülür, bütün lay suları yoxlanılıb, iki mikrobioloji çirklənmə faktı aşkar və ləğv edilib.
Keşlə qəsəbəsində kanalizasiya kollektorunda qəza nəticəsində çirkab suları 50-yə yaxın evi basıb.
