Azərbaycan, Bakı, 04 oktyabr / Trend , müxbir Ü.İsmayılova/ Yanvar-sentyabrda Azərbaycanın Dövlət Gömrük Komitəsi (DGK) dövlət büdcəsinə 844,6 mln.manat köçürüb. Proqnozlaşdırılan məbləğ 842 mln.manat olub, - şənbə günü DGK-dan bildiriblər.
Üç rübün yekunları üzrə gömrük rüsumlarından əldə edilən ödəmələr 2007-ci ilin analoji göstəricisini 46,92 faiz və ya 269,74 mln.manat ötüb. Nəticədə gömrük orqanları pronozu 100,31 faiz yerinə yetiriblər.
Gömrük orqanlarının proqnoz göstəricilərinin ildən-ilə artmasına baxmayaraq, DGK onların yenidən artırılması tendensiyasını davam etdirir. Bu, gömrük nəzarətinin gücləndirilməsi, xarici ölkələrlə əlaqələrin genişləndirilməsi nəticəsində idxal-ixrac əməliyyatlarının artırılması və irimiqyaslı layihələrin həyata keçirilməsi sayəsində təmin edilir.
Qaz və neftin ixracının artması ilə əlaqədar olaraq, yalnız yanvar-avqustda Azərbaycanın ümumi ixracı ötən ilin analoji dövrünə nisbətdə 844,5 faiz və ya $33,7 milyard artıb. İxracın ümumi həcmi $37,7 milyard təşkil edib.
Respublikaya malların idxalı 31,91 faiz və ya $1,09 milyondan $4,5 milyonadək artıb.
Bu dövr ərzində Azərbaycanın ticarət əməliyyatları 134 xarici ölkə ilə həyata keçirilib. Ölkədən 1767 növ mal ixrac, 5387 növ isə idxal edilib.
