Azərbaycan, Bakı, 23 oktyabr/ Trend , müxbir N.İsmayılova/ Azərbaycan İnvestisiya Şirkəti (AİŞ) və Özəl Sektorun İnkişaf İslam Korporasiyasının (İCD) təsis etdiyi Caspian International İnvestment Company (CİİC) 2008 - ci ilin sonu - 2009 - cu ilin əvvəlinədək ən azı üç layihəni maliyyələşdirməyi planlaşdırır, - CİİC-in icraçı direktoru Toğrul Köçərli cümə axşamı bildirib.
"Bu, CİİC-in kapitallaşdırılması prosesinin sürətlənməsindən asılıdır ki, bu proses də gələn ilin yanvar- fevralınadək başa çatacaq, - Köçərli bildiirb. - Səudiyyə Ərəbistanı, Küveyt, Oman, Yəmən o cümlədən Yaxın Şərq və Şimali Afrikadan olan sərmayədarlar şirkətin səhmdarlığına daxil olmaqda maraqlıdırlar".
Şirkətin kapitalını 70 mln. dollaradək artırmaq planlaşdırılır. Şirkət rəhbəri bu vəsaitin 2009-cu ilin sonunadək tam mənimsəniləcəyini gözləyir.
Caspian International İnvestment Company 2008-ci ilin martında, ilkin kapitalı 2,954 mln. manat olan Qapalı Səhmdar Cəmiyyət kimi təsis edilib. AİŞ - in iştirak payı 25, İCD - nin payı 75 faiz olub. CİİC kapitalının $70 mln.-a çatdırılması nəticəsində, sərmayə şirkətinin iştirak payı 20 faiz, Islam Korporasiyasının iştirak payı 10 faiz olacaq. Qalan səhmlər Fars körfəzi ölkələrindən olan sərmayədarlar tərəfindən alınacaq. AIŞ iştirak payının ödənilməsi üçün 14 mln. dollar verəcək.
Bu həftə İCD - nin nümayəndə heyətinin Bakıya səfəri zamanı, hazırda CİİC-in gələcək maliyyələşdirmə üçün üzərində işlədiyi layihələr nəzərdən keçirilib. Ümumilikdə, şirkət 20 -dən çox layihəni nəzərdən keçirir. Onların arasında daşınmaz əmlak (ofis və binalar), turizm, loqistika və infrastruktur sahəsində layihələr var.
Yalnız minoritar səhmdar kimi çıxış edə bilən AİŞ-dən fərqli olaraq, CİİC-in iştirak payı məhdudlaşdırılmayıb.
Strategiyaya əsasən, CİİC-in sərmayələri, şəriət prinsiplərinə zidd olan spirtli içkilər və donuz ətindən olan məhsulların istehsalı üzrə müəssisələr, standart maliyyələşdirmə və sığorta xidmətlərinin göstərilməsi şərtləri ilə fəaliyyət göstərən banklar və sığorta təşkilatları istisna olmaqla, iqtisadiyyatın real sektorunda həyata keçiriləcək.
Müəlliflə əlaqə saxlamaq üçün elektron ünvan: [email protected]
