Azərbaycan, Bakı, 24 oktyabr / Trend / Bakı metropoliteni sərnişindaşımanı ilin sonunadək 200 milyona çatdırmağı planlaşdırır. 2007-ci ildə bu göstərici 178 milyon nəfər olub. Bu barədə metropoliten rəhbəri Tağı Əhmədov rəsmi mətbuata müsahibəsində bildirib.
2002-ci ildə Bakı metrpoliteni tərəfindən 109, 2003-cü ildə 128, 2004-cü ildə 138, 2005-ci ildə 145 milyon sərnişin daşınıb. 2006-cı ildə isə bu göstərci 154 milyon sərnişin təşkil edib.
Əhmədov bildirib ki, metropoliten sutkada bir mln. sərnişin daşımaq gücünə malikdir.
Onun sözlərinə görə, 2040-cı ilədək Bakı metropoliteninin metro stansiyalarının sayı 21-dən 70-dək artacaq.
2009-cu ilin sonunadək istifadəyə verilməsi planlaşdırılan "Azədlıq Prospekti" metro stansiyasında platforma və iki çıxışın tikintisi üzrə işlər artıq başa çatdırılıb, həmçinin metronu elektrik enerjisi ilə təmin etmək üçün elektrik yarımstansiyası da tikilib.
Stansiyanın yerləşmə dərinliyi 12 metrdir. Hazırkı vaxtadək tikinti çərçivəsində 50 min kubmetr torpaq və 4,5 min kubmetr beton işləri görülüb. Bu stansiyanı avqustun 9-da açılan yeni "Nəsimi" stansiyası ilə birləşdirəcək tunelin uzunluğu 1300 metr təşkil edəcək.
Bakı metropoliteni "İçəri Şəhər" stansiyasından "Nəriman Nərimanov" stansiyasınadək üç aralıq stansiya ilə 1967-ci ildən fəaliyyət göstərir. Metropolitenin yeddi stansiyası ("İçəri Şəhər", "Sahil", "28 may", "Cəfər Cabbarlı", "Xətai", "Nizami", "Elmlər Akademiyası") dərin enişli, "Bakmil" - yerüstü, qalanları isə sütunlu, dayaz enişlidir (cəmi 20 stansiya).
