Azərbaycan, Bakı, 11 noyabr/ Trend , müxbir İ.Xəlilova/ "Azərbaycan hökumətinin beynəlxalq və digər maliyyə təşkilatları ilə bağladığı kredit sazişlərinin ümumi həcmi 2008-ci il oktyabrın 1-nə 6,3 mlrd. dollar təşkil edib", - maliyyə naziri Samir Şərifov çərşənbə axşamı Milli Məclisin 2009-cu ilin dövlət büdcəsi layihəsinin müzakirəsi üzrə plenar iclasında bildirib.
"Bu kredit ehtiyatları hökumət üçün prioritet proqramların, o cümlədən dövlət müəssisələrinin sosial və infrastruktur layihələrinin realizəsinə cəlb edilib", - Şərifov bildirib.
Bu kredit vəsaitlərinin 2,8 mlrd. dolları artıq istifadə edilib. 2008-ci ildə proqnozlaşdırılan ÜDM-də Azərbaycanın xarici borcunun xüsusi çəkisi 5,6 faiz təşkil edib ki, bu da dünya borclanmalar təcrübəsində aşağı səviyyə hesab edilir.
"Azərbaycan hökuməti əvvəlki illərdə olduğu kimi, 2009-cu ildə də xarici borlcanmalara xidmət göstərilməsi, üzvlük haqlarının ödənilməsinə xüsusi yer ayıracaq. Bu, dünya məkanında ölkənin nüfuzunu yüksəltməyə imkan verir", - nazir bildirib.
2009-cu ilin dövlət büdcəsində dövlət borcunun və beynəlxalq təşkilatlara üzvlük haqlarının ödənilməsi üçün 250 mln. manat ayrılıb. Bu vəsaitin 199 mln. manatı xarici borcların, 22,6 mln. manatı üzvlük haqlarının ödənilməsinə sərf olunacaq.
Müəlliflə əlaqə saxlamaq üçün elektron ünvan: [email protected]
