Azərbaycan, Bakı, 26 yanvar/ Trend , müxbir N.İsmayılova/
Azərbaycan Milli Bankının (AMB) məlumatlarına əsasən, neft sektoru nəzərə alınmaqla, 2008-ci ildə ölkənin xarici ticarət tərəfdaşlarının valyutalarına nisbətdə manatın real effektli məzənnəsi (REM) ümumi ticarət dövriyyəsində 28,2 faiz, idxalda 30,2 faiz və ixracda 26,9 faiz bahalaşıb, AMB-dən bazar ertəsi bildiriblər.
Aparılmış araşdırmalar göstərib ki, 2008-ci il ərzində xarici ticarətdə (neft sektoru nəzərə alınmaqla) REM-in artmasına ABŞ-ın payının təsiri 21 faiz, Avrozona - 28,5 faiz, İngiltərə - 59,9 faiz, Rusiya - 22,3 faiz, Türkiyə 44 faiz, Ukrayna - 53,7 faiz, Gürcüstan - 18,8 faiz, İran - 19,8 faiz, Qazaxıstan - 10,8 faiz, İsrail - 16,2 faiz səviyyəsində olub.
2008-ci ildə REM qeyri-neft sektorunda ümumi ticarət dövriyyəsində 28,2 faiz, idxalda - 29,1 faiz, ixracda - 25,1 faiz möhkəmlənib.
2000-ci ilin dekabrı ilə müqayisədə 2008-ci il ərzində qeyri-neft sektorunda ümumi ticarət dövriyyəsində (neft sektoru çıxılmaqla) REM-in möhkəmlənməsi templəri 14,1 faiz, idxalda 17 faiz olub, ixrac isə 2,8 faiz ucuzlaşıb. Neft sektoru nəzərə alınmaqla məzənnə müvafiq olaraq 21,8 faiz, 21,3 faiz və 22,5 faiz möhkəmlənib.
2008-ci il ərzində ABŞ, Avrozona, İngiltərə, Türkiyə, Rusiya, Gürcüstan, İsrail və Qazaxıstanın valyutalarına nisbətdə manatın real məzənnəsinin möhkəmlənmə templəri manatın nominal məzənnəsinin möhkəmlənmə templərini ötüb. Eyni zamanda manat nominal və real olaraq yapon valyutasına nisbətdə ucuzlaşıb.
Yanvarın 26-na olan cari mübadilə məzənnəsi -- 0,8052 AZN/USD.
Müəlliflə əlaqə saxlamaq üçün elektron ünvan: [email protected]
