Azərbaycan, Bakı, 17 fevral / Trend , müxbir S.Babayeva/ "Azərbaycanda 2009-cu ildə "quş qripin"dən xəbərdarlıq üzrə ikinci monitorinq başlayıb", - bazar ertəsi Kənd Təsərrüfatı Nazirliyi yanında Dövlət Veterinar Xidmətinin mətbuat xidmətinin rəhbəri Yolçu Xanvəli məlumat verib.
"Abşeron yarımadasındakı monitorinq artıq başa çatıb və bu ərazidə virusun olması əlamətləri aşkar edilməyib", - Xanvəli bildirib.
Monitorinq Səhiyyə, Kənd Təsərrüfati, Ekologiya və Təbii Sərvətlər nazirliklərinin əməkdaşları və Ovçular Cəmiyyətinin nümayəndələrinin daxil olduğu xüsusi qrup tərəfindən Abşeron yarımadası və ona yaxın ərazilər, Dəvəçi, Salyan, Ağcabədi, Lənkəran rayonları, Xəzər dənizi sahillərində həyata keçirilir.
Xanvəlinin sözlərinə görə, monitorinq bir həftədən çox davam edəcək. Monitorinqin yekunları çöl və ev quşlarından götürülən qan və patoloji material nümunəsinin analizinə əsasən fevralın 27-də elan olunacaq.
Dövlət Xidmətindən məlumat verilib ki, köçəri quşların fəal miqrasiyası martın sonunda başa çatacaq. Amma buna baxmayaraq, ölkənin epizootik durumu sabit hesab olunur.
Əvvəl keçirilən monitorinqdə də ölkədə "quş qripi" virusunun olmaması aşkar edilib.
Məqalə müəllifi ilə əlaqə ünvanı: [email protected]
