Azərbaycan, Bakı, 21 aprel / Trend , müxbir İ.Xəlilova /
Bu gün Bakıda Azərbaycan hökuməti ilə Dünya Bankı (DB) arasında ümumi həcmi 24 milyon dollar olan "Azərbaycanda Kənd Sərmayələri" (AzRİP) layihəsinin əlavə maliyyələşdirilməsi üzrə kredit müqaviləsinin imzalanma mərasimi baş tutub.
Azərbaycan tərəfdən kredit müqaviləsini kənd təsərrüfatı naziri İsmət Abbasov, Bank tərəfindən isə Bakı nümayəndəliyinin rəhbəri Qreqori Yeceyçak imzalayıb.
Əlavə maliyyələşdirmə layihənin tutum ərazisinin 24 rayona qədər genişləndirilməsi səbəbindən tələb olunub. Müvafiq olaraq onun realizə müddəti üç ilə qədər uzadılıb. Layihənin 2012-ci ilin martında başa çatması gözlənilir.
DB artıq 2005-ci ildən realizə olunan layihənin genişləndirilməsi üçün daha 15 milyon dollar verib. Azərbaycan hökumətinin payı isə 9 milyon dollardır.
Əlavə maliyyələşdirmə hesabına təxminən 350 kənd icmasının infrastruktur layihəsinin realizəsi üçün qrantlar verilməsi nəzərdə tutulub. Bununla belə bir minə qədər əhalisi olan kəndə maksimum 22 min dollar verilə bilər. Şimal regionunda mərkəz kimi Şəki, şimal-qərbdə Gəncə seçilib.
Hazırda bir müddət əvvəl maliyyələşdirilmiş layihələrin həyata keçirilməsi davam etdirilir. DB-nin maliyyələşdirilməsi bitdiyindən hökumət əlavə vəsait üçün müraciət edib. Bu, Bankın Azərbaycan kənd təsərrüfatının inkişafına sonuncu güzəştli krediti olacaq.
AzRİP üzrə kredit müqaviləsi 2004-cü il sentyabrın 23-də imzalanıb və 2004-cü il dekabrın 29-da qüvvəyə minib. Layihənin ümumi dəyəri 21.1 mln. dollardır. Bunun 15 mln. dolları MAR kreditləri, 3.3 mln. dolları Yaponiya hökumətinin qrantı, qalan hissəsi isə, hökumətin və benefisiarların (icmaların) layihədə iştirak payı hesabına ödənilib. 300-400 icmanın maliyyələşdirilməsini nəzərdə tutan layihənin 2009-cu ilin martınadək başa çatdırılması nəzərdə tutulmuşdu. AzRİP layihəsi NMR, Şirvan və Muğan-Salyan regionlarının 21 rayonunu əhatə edib.
Məqalə müəllifi ilə əlaqə ünvanı: [email protected]