Azərbaycan, Bakı, 24 aprel / Trend , müxbir N.İsmayılova /
2009-cu ilin birinci rübünün yekunu üzrə Azərbaycanda orta aylıq əmək haqqının həcmi 292 manat təşkil edib ki, bu da ötən ilin analoji dövr göstəricisinin həcmindən 26,5 faiz çoxdur. Bu barədə Dövlət Statistika Komitəsindən məlumat verilib.
Ən yüksək əmək haqqı istehsal sənayesi, maliyyə fəaliyyəti, daşınmaz əmlak əməliyyatları, icarə və istehlakçılara xidmət sahələri, həmçinin tikinti sektorunda işləyənlərdə qeydə alınıb.
Müəssisə və təşkilat işçiləri 1,9 mln. manat məbləğində sosial təminatlı müavinət alıblar. Əsasən istehsal sənayesi, enerji, qaz və su istehsalı və paylanması, emal sənayesi, nəqliyyat və rabitə sahələrində işləyənlər müavinət alıblar.
Hesabat dövründə orta aylıq əmək haqqı ayda əhalinin adam başına düşən orta pül gəlirlərini 52,2 faiz üstələyib.
Brinci rübdə əhalinin adambaşına düşən nominal gəlirləri 575,8 manat təşkil edib ki, bu da 2008-ci ilin analoji dövr göstəricisini 21 faiz üstələyir. Əhalinin adambaşına düşən real pul gəlirləri 20,9 faiz artım ilə 516,2 manata bərabər olub.
Yanvar-mart aylarının yekunu üzrə Azərbaycan əhalisinin nominal pul gəlirləri 4964 mln. manat təşkil edib ki, bu da ötən il qeydə alınan göstəricidən 21 faiz çoxdur. Bu dövr ərzində əhalinin real pul gəlirləri 22,3 faiz artım ilə 4450,3 mln. manata çatıb.
Hesabat dövründə əhali şəxsi gəlirlərinin 70,5 faizini mal almağa, 10,3 faizini vergi ödəmə, sosial sığorta və icbari üzvlük haqqına, 19,2 faizini isə kapitalın toplanması və artırılmasına sərf edib.
Məqalə müəllifi ilə əlaqə ünvanı - [email protected]
