Azərbaycan, Bakı, 28 aprel / Trend , müxbir N.İsmayılova /
Azərbaycan İqtisadi İnkişaf Nazirliyi yanında Sahibkarlığa Dəstək Fondunun (SDF) Müşahidə Şurası ASB Bank-a 1,9 milyon manat vəsaitin ayrılmasına icazə verdi. Bu barədə bankın rəhbəri Fərid Məmmədov deyib.
"Bu vəsait kiçik və orta sahibkarlığın, aqrar sahənin və digər investisiya layihələrinin güzəştli maliyyələşdirilməsi üçün nəzərdə tutulub", - Məmmədov deyib.
Onun sözlərinə əsasən, ayrılmış vəsaitin böyük hissəsi artıq istifadə edilib və 2009-cu ildə SDF tərəfindən əlavə kredit resurslarının ayrılacağı gözlənilir.
Aprelin 24-ü ölkənin şimalında yerləşən Xaçmaz rayonunda keçirilən kredit yarmarkası zamanı ASB Bank 8 subyektə güzəştli şərtlərlə hərəsinə 1000 manat olmaqla kredit ayırdı.
Bu günə kimi bank Azərbaycan regionlarında kənd təsərrüfatı inkişafı istiqamətində 1,564 milyon manat, kiçik və orta sahibkarlığın inkişafı istiqamətində 4,677 milyon manat və digər iri investisiya layihələrinə 4,2 milyon manat həcmində kredit xətlərini maliyyələşdirib.
Aprelin 28-nə olan rəsmi məzənnə 0,8034 AZN/USD təşkil edir.
Məqalə müəllifi ilə əlaqə ünvanı: [email protected]