Azərbaycan, Bakı, 15 may / Trend , müxbir Ü.İsmayılova /
"Azərbaycanda əhalinin ərzaq məhsulları ilə etibarlı təminatına dair Dövlət Proqramına uyğun olaraq aqrar sahədə aparılan davamlı tədbirlər nəticəsində, ölkə əhalisinin etibarlı ərzaq məhsulları ilə təminatı və tənzimlənməsi istiqamətində 2008-ci ilin yekunları və 2009-cu ilin birinci rübü üzrə kənd təsərrüfatı sahəsində əsaslı işlər görülüb. Belə ki, dənli və dənli paxlalı bitkilərin 2008-ci ildə istehsalı 2498,0 min tona, o cümlədən ərzaq buğdası 1678 min tona, arpa 622,0 min tona, qarğıdalı 162,0 min tona çatdırılıb", - cümə günü Azərbaycan kənd təsərrüfatı naziri İsmət Abbasov Trend -a deyib.
"Ötən il 1,22 mln. ton tərəvəz-bostan məhsulları, 1,07 mln. ton kartof, 713,0 min ton meyvə-giləmeyvə, 116 min ton üzüm, 193 min ton şəkər çuğunduru istehsal edilib", - nazir deyib.
Onun sözlərinə görə, 2008-ci ilin payızında 700 hektar üzüm bağları, 5200 hektar yeni meyvə bağları salınıb.
Kənd təsərrüfatı bitkilərinin əkin strukturunda əhəmiyyətli dəyişikliklər baş verib, əsasən dənli və dənli-paxlalı bitkilərin, buğdanın istehsalına diqqət artırılıb, əkilmiş sahələrin ümumi əkin yerinə görə xüsusi çəkisi artaraq 2000-ci ildəki 51,7 faizdən 2008-ci ildəki 81,0 faizə çatdırılıb.
Taxıl istehsalçılarına verilən yardımların, texnika və gübrələrə edilən güzəştlərin nəticəsində 2009-cu ildə taxıl sahələri genişləndirilib, 2008-ci ilə nisbətən taxıl əkini sahələri 222 min hektar artaraq 1052 min hektara çatdırılıb, buğdanın əkin sahəsi isə 209 min hektar artaraq 807 min hektar təşkil edib.
"Kənd təsərrüfatında ümumdaxili məhsulun 2008-ci ildə 2007-ci ilə nisbətən artımı 6,1 faiz təşkil edib ki, bu da həmin dövr üçün sənayenin ümumdaxili məhsulunun artımını 0,1 faiz üstələyib", - Abbasov deyib.
Hava şəraitinin kənd təsərrüfatı məhsullarının istehsalı üçün əlverişli olması, payız və yaz tarla işlərinin optimal müddətdə aparılması cari ildə bol məhsul yetişdirilməsi üçün zəmin yaradıb və nəticədə 2009-cu ilin birinci rübündə kənd təsərrüfatı məhsullarının artım tempi 2008-ci ilin müvafiq dövrünə nisbətən 4,3 faiz artıb. Kənd təsərrüfatı məhsulları istehsalının intensivliyinin ilin 2-ci və 3-cü rüblərində artacağı nəzərə alınarsa, məhsul istehsalının artım tempinin 2009-cu ilin yekununda 7 % səviyyəsində və ya 2008-ci ilə nisbətən 0,9% artıq olacağı gözlənilir.
Artıq yaz-tarla işlərinin aparılmasına, xüsusilə də yazlıq bitkilərin səpilməsinə başlanılıb. 2009-cu il aprelin 1-dək respublika üzrə 104,4 min hektar sahədə yazlıq bitkilər əkilib.
"Görülən tədbirlərin nəticəsi olaraq 2009-cu ildə taxıl istehsalı həcminin 2960 min ton, o cümlədən buğda istehsalının 2180 min ton olacağı gözlənilir ki, bu da 2008-ci ilə nisbətən taxıl istehsalının 462 min ton artmasını və əhalinin ərzaq buğdasına olan tələbatının daxili istehsal hesabına ödənilməsini təmin edəcək", - nazir deyib.
Məqalə müəllifi ilə əlaqə ünvanı: [email protected]
