Azərbaycan, Bakı, 11 avqust / Trend , müxbir E. İsmayılov /
Çərşənbə günü "Azərbaycan Dəmir Yolları" QSC Bakı-Abşeron istiqaməti üzrə Zabrat II-Qala ərazisində elektrik dəmir yol xətlərinin demontaj işlərinə başlayacaq. Bunu çərşənbə axşamı QSC-nin mətbuat xidmətinin rəhbəri Nadir Əzməmmədov deyib.
"Demontaj işləri bu gün başlamalı idi. Lakin əlverişsiz hava şəraitinə görə işlərin sabah başlanılması barədə qərar verildi", - Əzməmmdəov deyib.
Bu dəmir yol hissələrində demontaj işlərinin aparılmasının əsas səbəbi son illər elektrik qatarları ilə sərnişin daşınmasının azalması və bunun nəticəsi olaraq reyslərin gəlir gətirməməsi ilə əlaqədardır. "Həyata keçirilən daşınmanın gəlir gətirməməsi dəmir yollarının iqtisadi vəziyyətinə ciddi ziyan vurur", - Əzməmmədov əlavə edib.
Demontaj işləri zamanı dəmir yol xətti və digər texniki qurğular söküləcək, yararlı materiallar yolların digər hissələrində istifadə olunacaq.
Əzməmmədovun dediyi kimi, 30 kilometr uzunluğunda bir zolaqlı Zabrat II - Maştağa - Bağlar - Buzovna - Zuqulba - Sahil - Mərdakan - Qala dəmir yol xətti mərhələlərlə söküləcək. Demontajdan sonra ləğv edilmiş bu xəttin materialları ilk növbədə ikizolaqlı Zazalı-Gəncə, birzolaqlı Heybət-Biləcəri və ikizolaqlı Güzdək - Vaş - Xırdalan xətlərinin əsaslı təmiri zamanı istifadə olunacaq.
Məqalə müəllifi ilə əlaqə ünvanı: [email protected]
