Azərbaycan, Bakı, 13 avqust / Trend , müxbir N.İsmayılova /
Azərbaycanın Qiymətli Kağızlar üzrə Dövlət Komitəsinin (QKDK) əməkdaşlarının potensialının davamlı artırılması xüsusi əhəmiyyət kəsb edir və komitə üçün əsas prioritetlərdən biri hesab olunur. Bu istiqamətdə səylərin daha da gücləndirilməsi zəruridir. QKDK sədri Rüfət Aslanlı beynəlxalq maliyyə hesabatı standartları üzrə təlim seminarlarının yekunları ilə bağlı müzakirədə bildirib. Seminarlar QKDK, Bakı Fond Birjası (BFB) və Milli Depozit Mərkəzi (MDM) üçün Azərbaycan Bank Təlim Mərkəzi tərəfindən keçirilir. Bu barədə Dövlət Komitəsinin məlumatında deyilir.
Təlimlər Avropa Birliyinin TACIS proqramının "Azərbaycanda investisiya və ixrac mühitinin yaxşılaşdırılmasına dəstək" layihəsi çərçivəsində həyata keçirilib.
Seminarlar biznes əməliyatlarının maliyyə hesabatlılığının aparılması, maliyyə idarəetməsi və risklər, aktivlərin dəyərləndirilməsi və yenidən qiymətləndirilməsinin müqayisəli metodologiyası, milli standartlar və IFRS istifadə edilməklə maliyyə nəticələrinin, konsolidə olunmuş maliyyə hesabatlarının təhlili və digər mövzularda keçirilib.
2010-cu ilə kimi TACIS layihəsi çərçivəsində qiymətli kağızlar bazarına nəzarət mexanizmləri, bazarda manipulyasiyanın qarşısının alınması, bazarda hesabat və klirinq fəaliyyəti, birja işinin təşkili və risklərin idarəsi mövzularını əhatə edən bir sıra seminarların keçirilməsi planlaşdırılır. Eyni qiymətli kağızlar bazarının tənzimlənməsində inkişaf etmiş ölkələrin təcrübəsindən istifadə edilməsi məqsədi ilə həmin ölkələrə səfərlərin təşkili də planlaşdırılır.
TACIS layihəsinin ayrıca komponentlər üzrə əsas benefisiarları QKDK, BFB, Azərbaycan İnvestisiya Fondu və Azərbaycanın İxrac və İnvestisiya Təşviqi Fondudur. (AZPROMO)
Layihə çərçivəsində qiymətli kağızlar bazarının inkişafı məqsədi ilə müxtəlif istiqmətlərdə, xüsusilə də qanunverici və nizamlama çərçivələrinin inkişafı, QKDK, MDM və BFB-nin institutsional potensialının genişləndirilməsi, təlim proqramının təşkili və ictimaiyyətin maarifləndirilməsi üzrə işlərin gücləndirilməsi istiqamətində tədbirlərin həyata keçirilməsi nəzərdə tutulub.
Layihə üzrə konsultasiya xidmətləri tender üsulu çərçivəsində səkkiz "şort-list" iddiaçıları arasından seçilən (FR) - IVEX (ES), Belgian Bankers Academy (BE) konsorsiumu tərəfindən göstərilir.
Layihənin dəyəri üç milyon avro həcmində qiymətləndirilir və iki-üç ilə nəzərdə tutulub. "Azərbaycanda investisiya və ixrac mühitinin yaxşılaşdırılmasına dəstək" layihəsi çərçivəsində yardım TACIS ilə AZPROMO-nun işlərinin davamı olacaq.
Sözügedən layihə 2006-cı il iyunun 15-də Avropa Komissiyası tərəfindən təsdiq edilən fəaliyyət proqramına daxil edilib. Lakin maliyyə memorandumu 2007-ci ildə imzalanıb.
Məqalə müəllifi ilə əlaqə ünvanı: [email protected]
