Azərbaycan, Bakı, 20 avqust / Trend , müxbir İ.Xəlilova/
İqtisadi İnkişaf Nazirliyinin Sahibkarlığa Yardım Milli Fondu ölkənin 4 iqtisadi rayonunda - Aran, Quba-Xaçmaz, Gəncə-Qazax və Lənkəranda soyuducu anbar komplekslərinin tikintisi üzrə sahibkarlıq subyektlərinin təqdim etdiyi layihələrin maliyyələşdirilməsinə başlayıb.
Nazirlikdən bildirildiyi kimi, Milli Fonda təqdim edilən 12 investisiya layihəsindən Aran iqtisadi rayonu üzrə 2, Quba-Xaçmaz iqtisadi rayonu üzrə 2 və Gəncə-Qazax iqtisadi rayonu üzrə 1 investisiya layihəsi olmaqla, 5 sahibkarlıq subyektinə güzəştli kreditlər verilib.
Milli Fondun nümayənədləri cümə axşamı Salyan rayonunda fəaliyyət göstərən "Ələddin Fermer" MMC tərəfindən həyata keçirilən anbar kompleksinin tikintisinin gedişi ilə tanış olublar.
Güzəştli kredit hesabına anbarın inşasına başlanılıb və ötən ildə alınan maliyyə yardımı hesabına Astara və Salyanda meyvə bağları salınıb.
Salyanda sahibkar Nizami Hüseynov tərəfindən alınan kredit hesabına aparılan kompleksin inşası tamamlanma mərhələsindədir və hazırda soyuducu qurğuların quraşdırılması işləri gedir.
Sahibkarlığa Yardım Milli Fondu soyuducu anbar komplekslərinin inşasına 1,5 milyon manat güzəştli kredit ayrırıb. Layihənin ümumi dəyəri altı milyon manat təşkil edir. Bu vəsait Salyan rayonunun Çuxanlı kəndində 2250 kvadratmetr ərazidə istehsal olunan məhsulların (pomidor, xiyar və üzüm) 10,5 min tonunu saxlamaq imkanına malik olan soyuducu anbarların inşası üçün nəzərdə tutulub. Burada saxlanılan tezyetişən kənd təsərrüfatı məhsullarının 60 faizi daxili bazarda, 40 faizi isə xarici bazarda satılacaq. Layihənin həyata keçirilməsi 50-dən çox yeni iş yerinin açılmasına şərait yaradacaq.
Avqustun 20-nə olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]
