Azərbaycan, Bakı, 21 avqust / Trend , müxbir İ.Xəlilova /
"Azərbaycan İnvestisiya Şirkəti (AİŞ) və Özəl Sektorun İnkişafı İslam Korporasiyası (ICD) tərəfindən təsis edilmiş Caspian International Investment Company (CIIC) sentyabrın sonuna qədər Samuxda soyuducu anbar kompleksinin tikintisi üzrə birinci layihədəki pay iştirakını artırmağa hazırdır", - cümə günü CIIC-nin icraçı direktoru Toğrul Köçərli məlumat verib.
Sərmayələşdirmə üzrə CIIC və "N.A.A. Agrotara" MMC arasındakı müqavilə iyunda imzalanıb.
"İlkin mərhələdə biz bu müəssisədə 16 səhm alaraq 1,9 milyon dollar sərmayə qoyduq, ancaq sentyabrın sonuna qədər iştirak payımızı 36 faizə qədər artıraraq sərmayələrimizin həcmini 5,5 milyon manata çatdıracağıq", - Köçərli bildirib.
Bu gün CIIC 25 min ton gücü olan anbarın tikintisi üzrə aparılan işlərə baxış keçirib. Kompleks tam tikilib və lazımi müasir avadanlığın qurulması həyata keçirilib.
"N.A.A. Agrotara" kompleksin tikintisinə 10 milyon manatdan çox sərmayə qoyub. CIIC-nin qoyacağı əlavə vəsaitlər isə meyvə və tərəvəzlərrin seçilməsi və qablaşdırılması üçün avadanlığın alınmasına sərf olunacaq", - Köçərli deyib.
"Bu gün Gəncə və ona yaxın rayonlarda fəaliyyət göstərən bəzi fermerlər öz meyvə-tərəvəz məhsullarının saxlanması üçün "N.A.A. Agrotara"nın soyuducu anbarlarından yararlanırlar", - Köçərli qeyd edib.
"N.A.A. Agrotara" artıq fəaliyyət göstərən anbarın bazasında kompleks qurub. Şirkət onun yenidən qurulması zamanı məhsulun soyuducu anbarlarda daha uzun müddət saxlanmasına imkan verən yeni, müasir avadanlığın quraşdırılmasına sərmayə qoyub.
Cümə günü "Sahibkarlığa dövlət dəstəyinə dair" konfrans çərçivəsində komplekslə tanışlıq baş tutub.
Bu tərkibdə ilk dəfə keçiriləcək konfransda Sahibkarlığa Yardım Milli Fondu, AİŞ, CIIC, Bakı Fond Birjasının nümayəndələri iştirak edirlər. Tədbirdə Gəncə-Qazax iqtisadi rayonunun logistik, kənd təsərrüfatı, infrastruktur və s. sahələrdə ixtisaslaşan sahibkarları iştirak edir.
Caspian International Investment Company 2008-ci ilin martında 2,954 milyon manatlıq ilkin kapitalla QSC kimi qeydiyyatdan keçib. AİŞ-in iştirak payı 25, ICD-nin iştirak payı isə 75 faiz təşkil edib.
AİŞ öz payının ödənilməsi üçün ümumilikdə 14 milyon dollar verib.
Strategiyaya əsasən, CIIC-nin sərmayəsi, şəriət prinsiplərinə zidd olan spirtli içki və donuz məhsulları istehsalı istisna olmaqla, iqtisadiyyatın real sektorunda həyata keçiriləcək. CIIC rəhbərinin sözlərinə görə, hazırda layihə üzərində iş davam etdirilir.
Avqustun 21-nə olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]
