Azərbaycan, Bakı, 24 sentyabr / Trend , müxbir A.Bədəlova /
"Unibank" ASC kommersiya bankı qısamüddətli və ortamüddətli perspektivlərdə iri həcmdə xarici alınmaların qaytarılmasını gözləmir. Bu barədə cümə axşamı bankın İdarə Heyətinin sədri Faiq Hüseynov deyib.
"Qısamüddətli və ortamüddətli perspektivlərdə bankın iri qaytarılması yoxdur, buna görə də, likvidlik məsələsi bizim üçün maneə və ya problem deyil. Bu günə bankın bütün əsas qısamüddətli alınmaları ödənilib", - Hüseynov deyib.
Onun sözlərinə görə, bank 2008-ci ilin oktyabrından başlayaraq 2009-cu ilin mayınadək 160 milyon dollardan çox məbləğdə xarici alınmaları bağlayıb.
Hüseynovun dediyinə görə, bu ilə təxminən 8-9 milyon dollarlıq cüzi məbləğ qalıb.
2009-cu il iyunun 1-nə olan vəziyyətə görə, bankın xarici borcu 280,87 milyon manat - 86,2 milyon dollar, 2,85 milyon avro və 191,82 milyon manat olub.
Avropa Yenidənqurma və İnkişaf Bankından "Unibank" 54 milyon dollar məbləğində kreditlər cəlb edib. Xarici borclardan Qara dəniz Ticarət və İnkişaf Bankından kreditlərin payına 8 milyon dollar, Beynəlxalq Maliyyə Korporasiyasına 21,5 milyon dollar, FMO Hollandiya İnkişaf Fonduna 25 milyon dollar, İslam İnkişaf Korporasiyasına 1,7 milyon dollar, VTB Europa-nın payına 30 milyon dollar, Deutsche bank AG-yə 6,9 milyon dollar, Deutsche Bank London-un payına 30 milyon dollar düşür. Alman-Azərbaycan Fondunun xətti ilə 2,275 milyon avro cəlb edilib.
Sentyabrın 24-nə olan rəsmi məzənnə 0,8034 AZN/USD təşkil edir.
Məqalə müəllifi ilə əlaqə ünvanı: [email protected]
