Azərbaycan, Bakı, 22 oktyabr / Trend , müxbir İ.Xəlilova/
Beynəlxalq Valyuta Fondunun (BVF) kredit xəttinin olmadığı ölkələrdə daimi nümayəndəliklərinin saxlanılmasına ehtiyac duymaması səbəbindən Azərbaycandakı nümayəndəliyin bağlanması qərarı təbiidir. Bu barədə Azərbaycanın maliyyə naziri Samir Şərifov deyib.
"Valyuta Fondu ofisini öz proqramlarını həyata keçirdiyi ölkələrə köçürür. Bizim isə fondla kredit proqramımız yoxdur və BVF hesab edir ki, Azərbaycan özü öz məsələlərini normal şəkildə həll edir. Buna görə də fondun Azərbaycanda nümayəndəliyinin saxlanılmasına ehtiyac duymur", - nazir deyib.
Onun sözlərinə görə, ehtiyac olmadığına görə, gələcəkdə Valyuta Fondundan kredit dəstəyinin alınması gözlənilmir.
Fondun sözügedən qərarı barədə Mərkəzi Asiya və Yaxın Şərq üzrə departamentin başçısı Devid Ouenin yayda Bakıya səfəri zamanı bildirilmişdi. Ouen səfəri zamanı ölkənin Baş naziri, maliyyə naziri, Mərkəzi Bankın rəhbəri ilə görüşlər keçirmişdi. BVF-in Azərbaycan nümayəndəliyinin rəhbəri Koba Qvenetadze ölkədəki fəaliyyətini başa vuracaq. Cümə axşamı nümayəndəlikdən verilən məlumata əsasən, bəzi əməkdaşlar fəaliyyətlərini noyabradək davam etdirəcək, daha sonra nümayəndəliyin ştatı iki nəfərədək azalacaq. 2010-cu ilin mart ayında Azərbaycanda BVF-in yalnız bir əməkdaşı - meneceri qalacaq.
BVF-in bu cür mövqeyi MDB-nin Qazaxıstan, Türkmənistan və Özbəkistan kimi ölkələrində istifadə olunur. Gürcüstanda da əvvəlcə ofis fəaliyyət göstərirdi, ölkədə hərbi əməliyyatların başlanmasından sonra ofis daimi nümayəndəliyə çevrilib.
BVF-in Azərbaycandakı daimi nümayəndəliyi 1993-cü ildən fəaliyyət göstərir, lakin hökumət ilə əməkdaşlıq 1992-ci ildən başlayıb. Ölkəyə kreditlərin verilməsinə beynəlxalq təşkilat 1995-ci ildən başlayıb. İndiyə kimi BVF Azərbaycan Respublikasına altı proqram çərçivəsində kredit ayırıb, lakin 2005-ci ildən başlayaraq BVF ilə əməkdaşlıq məsləhətləşmələr səviyyəsində həyata keçirilir, belə ki, Azərbaycan hökuməti fonddan kredit alınmasından imtina edib.
Hazırda qlobal maliyyə böhranına baxmayaraq, ölkə tərəfindən fonddan vəsait alınmasının bərpa edilməsi şərtləri yoxdur.
Mərkəzi Bankda Valyuta Fondu tərəfindən gələcəkdə də texniki yardım proqramının davam etdirilməsi imkanları istisna edilmir. Lakin son zamanlar onların həcmi də azalıb. Texniki əməkdaşlığın davam etdirilməsi ilə əlaqədar fond "BVF-in yaradılması haqqında" müqavilənin IV bəndi üzrə qısamüddətli və uzunmüddətli perspektivlərin illik qiymətləndirilməsini keçirmək niyyətindədir və bu məqsədlə fondun missiyasının ölkəyə növbəti səfəri gələn ilin əvvəlində gözlənilir.
Məqalə müəllifi ilə əlaqə ünvanı: [email protected]
