Azərbaycan, Bakı, 26 oktyabr / Trend , müxbir Ü.İsmayılova/
Bakı Rieltorlar Assosiasiyası (BRA) daşınmaz əmlakın vahid elekron məlumat bazasının yaradılması üzrə işləri davam etdirir. Bu barədə "MBA Group" konsaltinq şirkətinin baş direktoru, assosiasiyanın həmtəsisçisi Nüsrət İbrahimov bazar ertəsi bildirib.
"Hazırda məlumat bazası üçün Bakıdan və ölkə regionlarından məlumatlar toplanılır", - İbrahimov deyib.
Onun sözlərinə görə, resursların məhdud olması səbəbindən assosiasiya məlumatların toplanması zamanı bir sıra problemlərlə qarşılaşır.
"Buna baxmayaraq, nəticələr oktyabrın 30-da BRA-nın ümumi iclasında müzakirəyə veriləcək", - o deyib.
Bir müddət əvvəl assosiasiya prezidenti Vəfadar Axundov demişdi ki, belə bazanın yaradılması üçün 30 min manata yaxın vəsait tələb olunur. Bununla əlaqədar olaraq, assosiasiya bir sıra yerli banklara müraciət etsə də, onlar vəsait ayırmaqdan imtina ediblər.
BRA-nın təsisçiləri "MBA Group" şirkəti, "New Europe" və "Baki Emlak" rieltor şirkətləridir. 2008-ci ilin oktyabrında assosiasiya Azərbaycan Ədliyyə Nazirliyində qeydiyyatdan keçib. Bu gün assosiasiyanın 53 üzvü var, onlardan 13-ü hüquqi şəxs, 40-ı fiziki şəxsdir.
Assosiasiyanın hüquqi şəxslər üçün üzvlük haqqı 300 manat, fiziki şəxslər üçün isə100 manatdır.
Assosiasiyanın əsas məqsədləri Azərbaycanda rieltor fəaliyyəti standartlarının müəyyənləşdirilməsi, xüsusi peşəkar hazırlıq mərkəzinin yaradılması, həmçinin rieltorların sertifikasiya sisteminin tətbiqidir.
Oktyabrın 26-na olan rəsmi məzənnə 0,8031 AZN/USD təşkil edir.
Məqalə müəllifi ilə əlaqə ünvanı: [email protected]
