Azərbaycan, Bakı, 30 oktyabr / Trend , müxbir Ü.İsmayılova/
Bakının təkrar mənzil bazarında bir kvadratmetrin qiyməti 0,2 faiz azalaraq 1282 dollardan 1280 dollara çatıb. Bu göstərici 2007-ci ilin fevral ayına olan göstərici ilə təxminən bərabərdir. Bu barədə "Əmlak Bazarı İştirakçıları" İctimai Birliyindən cümə günü yayılan məlumatda deyilir.
Qiymətlərin ən yüksək artımı Bakının Suraxanı rayonunda müşahidə edilib - 9,2 faiz. Həmçinin Sabunçu rayonunda da bir faizlik artım müşahidə olunub. Digər rayonlarda qiymətlərin azalması müşahidə edilib. Ən çox azalma isə Qaradağ rayonunda müşahidə edilib - 11,8 faiz.
Bazarda orta qiymətlə təklif edilən mənzillərin payı bazarın ümumi portfelinin 55,5 faizini təşkil edib. Sentyabrda mənzillərin orta otaq göstəricisi 2,44 faiz təşkil edib (6,1 faizlik artımla). Otaqların orta qiyməti 2 faizlik azalma ilə 47,361 min dollar, mənzillərin qiyməti isə 4 faizlik artımla 115,561 min dollar təşkil edib.
Sentyabrda Bakının mənzil bazarında alış-satış üzrə sövdələşmələrin 0,7 faizlik artımı müşahidə edilib.
Ümumilikdə, sentyabr ayında Bakının təkrar mənzil bazarında təkliflər 8,3 faiz artıb. Bazardakı orta qiymət isə avqustla müqayisədə təxminən dəyişməz olaraq qalıb. Bakının təkrar mənzil bazarı portfelində yeni tikililərin payı 27 faizdən 57 faizədək artıb.
İpoteka kreditləşməsinin bərpa edilməsi ilə paytaxtda təkrar əmlak likvidliyi artıb, lakin risk dərəcəsi hələ də yüksəkdir. Təkrar mənzil bazarında sövdələşmələrin sayının artması mənzillərin ekspozisiya müddətinin də 6 gün azalaraq 102 günə çatmasına səbəb olub.
Bakının təkrar mənzil bazarının mədaxil əmsalı 1,8 faiz azalıb.
Təkrar mənzil bazarı porfelinin böyük hissəsini Yasamal, Xətai, Nərimanov və Nəsimi rayonlarındakı mənzillər təşkil edib. Bazarın ümumi həcminin 78,1 faizi bu rayonların payına düşür. Bazarda 3 otaqlı mənzillərin payı 39,3 faiz, iki otaqlı mənzillərin payı isə 36,9 faiz təşkil edib.
Avqustda Bakının təkrar mənzil bazarında təkliflər 15 faiz azalıb və bu ay bazarda 6,6 min mənzil təklif olunub.
Məqalə müəllifi ilə əlaqə ünvanı: [email protected]
