Azərbaycan, Bakı, 25 fevral / Trend , müxbir İ.Xəlilova/
Azərbaycanda Vergilər Nazirliyinin "bir pəncərə" sistemi vasitəsilə "AĞSTAFASÜD" ASC qeydiyyata alınıb. ASC-nin inşası Azərbaycan İnvestisiya Şirkəti (AİŞ) və Almaniyanın RAO AgroMilk GmbH şirkəti tərəfindən həyata keçirilir.
Şirkət 2010-cu il yanvarın 27-də qeydiyyatdan keçib. Şirkətin təsisçisi RAO AgroMilk GmbH, qanuni təmsilçisi Rəsul Orucovdur. MMC 200 min manat nizamnamə kapitalı ilə qeydiyyata alınıb.
Süd kompleksi Ağstafa rayonunda Böyük-Kəsik kəndində yerləşəcək və özündə dörd təsərrüfatı birləşdirəcək.
Layihəyə görə, süd kompleksinin gücü gündə 50 ton süd olacaq. İlk iki ildə müəssisədə beş növdə sterilizə edilmiş süd, yoqurt, xama istehsal olunacaq. Ümumilikdə, il ərzində 18 milyon litrdən çox süd məhsullarının istehsalı, həmçinin süd, ət və cins heyvanların alınması üçün heyvandarlığın inkişafı gözlənilir. Kompleksin fəaliyyətinin üçüncü ilində istehsal edilən məhsulların çeşidinə kərə yağı və digər heyvandarlıq məhsulları əlavə ediləcək.
Hesablamalara görə, süd kompleksinin heyvandarlıq üçün illik yem tələbatı 65 min ton səviyyəsində gözlənilir. Bunun 95 faizi kompleksdə istehsal olunacaq. Bu məqsədlə kompleksə 2,7 min hektar torpaq sahəsi ayrılacaq.
İlkin hesablamalara görə, kompleksin ümumi dəyəri 30 milyon avro həcmində qiymətləndirilir. Müəssisənin ilkin nizamnamə kapitalı 5 milyon avro təşkil edəcək. Bunun 4 milyonu xarici investorların payına düşəcək. Kompleksin kapitalında AİŞ-in payı 20 faiz təşkil edir.
Ötən ilin dekabrında Bakıda AİŞ və RAO Agro Milk arasında Ağstafa süd kompleksinin inşasına dair qarşılıqlı anlaşma haqqında saziş imzalanıb. Layihənin reallaşması üçün Avropa banklarından kreditin cəlb olunması planlaşdırılır. Kompleksin inşasına 2010-cu ilin birinci rübündə başlanacaq.
