Azərbaycan, Bakı, 16 aprel /Trend, müxbir N.İsmayılova/
Azərbaycanda yol təhlükəsizliyi sahəsində strategiyanın qəbuluna və tədbirlər planının hazırlanmasına ehtiyac var. Bunu cümə günü Dünya Bankının infrastruktur üzrə eksperti Nicat Vəliyev "Yol-nəqliyyat qəzalarında ölüm hallarına qarşı mübarizə: Avropanın və Mərkəzi Asiyanın yollarında təhlükəsizliyin təminatı" adlı hesabatının təqdimatında deyib.
"DB-nin Azərbaycanda yol təhlükəsizliyi proqramının əsas məqsədləri yollarda vəziyyətin yaxşılaşdırılması, yol infrastrukturuna investisiyaların artırılmasə və kapital qoyuluşlarının ümumi həcmində onların 10 faizə çatdırılması, strategiyanın və tədbirlər planının hazırlanması və müəyyən normativ və tənzimləyici çərçivələrin yaradılmasıdır", - Vəliyev deyib.
2005-2009-cu illərdə Azərbaycanın yol infrastrukturuna 3,8 milyard dollara yaxın investisiya qoyulub.
Onun sözlərinə görə, iki magistral yol layihəsi çərçivəsində bank yol təhlükəsizliyi üzrə milli strategiyanın və beşillik tədbirlər planının hazırlanmasına başlayıb.
"Bank həmçinin bu sahəyə iki milyon dollar məbləğində texniki yardımın göstərilməsini nəzərdə tutur", - Vəliyev deyib.
Tenderin qalibi olan İsveçin SweRoad şirkəti bir ay ərzində DB-nin texniki yardımı çərçivəsində tədbirlərin reallaşmasına başlayacaq.
Onun sözlərinə görə, üçüncü magistral layihə çərçivəsində bu sahədə dəstəyin davam etdirilməsi planlaşdırılır.
