...

Azərbaycanda təbii fəlakət zonasında kənd təsərrüfatı istehsalçıları üçün kompensasiyaların həcminin müəyyən edilməsi üzrə göstəriş verilib

Biznes və iqtisadiyyat xəbərləri Materials 18 May 2010 17:08 (UTC +04:00)

Trend-i buradan izləyin

Azərbaycan, Bakı, 18 may /Trend, müxbir Ü.İsmayılova/

Azərbaycanın kənd təsərrüfatı naziri İsmət Abasovun sədrliyi ilə çərşənbə axşamı ölkənin Şirvan rayonunda leysan yağışları və sellərin nəticələrinin aradan qaldırılması məsələlərinin müzakirəsinə həsr olunmuş regional qərargahın ilk iclası keçirilib. Bu barədə nazirlikdən çərşənbə axşamı məlumat verilib.

"Nazir bitkiçilik və heyvandarlıq sahəsində mütəxəssislərin hesabatlarını dinləyib, eləcə də dəyən ziyanın həcminin müəyyən edilməsi barədə tapşırıq verib", - nazirlikdən bildirilib.

Mənbənin sözlərinə görə, nazirliyin regional qərargahı yekun qiymətləndirmələrin aparılması və dövlət vəsaiti hesabına tam ödəniləcək kompensasiyanın məbləğini müəyyən etmək məqsədilə gündəlik informasiyaları toplayacaq.

"Hazırda kənd təsərrüfatı naziri İsmət Abasov fəlakət zonasındadır və vəziyyətlə tanış olur", - nazirlikdən bildiriblər.

Azərbaycanın kənd təsərrüfatı naziri İsmət Abasovun sərəncamı ilə mayın 17-də Azərbaycanın Şirvan rayonunda ölkə əhalisinə daşqınlardan və leysan yağışlarından dəyən ziyanın qiymətləndirilməsi üçün regional qərargah yaradılıb. Regional qərargahın rəhbəri kənd təsərrüfatı nazirinin müavini Aslan Aslanov təyin edilib. Regional qərargahın əsas istiqamətləri su altında qalan ərazilərin öyrənilməsi, ziyanın qiymətləndirilməsi, eləcə də sonralar fermerlərə və ev təsərrüfatı sahiblərinə kompensasiyaların verilməsi haqqında qərarın qəbul edilməsidir.

Nazirliyin regional qərargahı regionun icra hakimiyyətləri, eləcə də müvafiq dövlət strukturları ilə birgə işləyəcək.

Son günlər ərzində yağan intensiv yağışlar nəticəsində, Kürün məcradan çıxması və digər çaylarda daşqınlar səbəbindən 40 rayonun ərazisində subasma halları qeydə alınıb. Bu təbii fəlakət nəticəsində 20 minə yaxın ev su altında qalıb, 300-dən çox ev dağılıb, 2 min ev qəzalı vəziyyətdədir və 50 min hektar əkin və örüş sahələrini su basıb.

Ekologiya və Təbii Sərvətlər Nazirliyinin Milli Hidrometeorologiya Departamenti Kürün aşağı axarında suyun səviyyəsinin artacağını proqnozlaşdırır. Bu proqnozlara səbəb mayın 15-dən 16-dək Kür, Araz və Qanıx çaylarının hövzələrində intensiz leysan yağışlarının yağmasıdır. Departament xəbər verir ki, yaxın vaxtlarda qonşu ölkələrin Kür, Araz və Qanıx çaylarının hövzələrində suyun səviyyəsinin artması ilə əlaqədar Kür çayının aşağı axarında suyun səviyyəsinin artacağı gözlənilir.

Mayda yağan leysan yağışları nəticəsində Zərdabda Kür çayının səviyyəsi 10 santimetr, Şirvanda və Salyanda 15, Bankə qəsəbəsində 6 santimetr, Novruzlu kəndində Araz çayının səviyyəsi isə 8 santimetr artıb.

Xəbər lenti

Xəbər lenti