Azərbaycan, Bakı, 29 iyul /Trend, müxbir N.İsmayılov/
Azərbaycan Əmlak Məsələləri Dövlət Komitəsinin məlumatına görə, yanvar-iyun ayları ərzində investisiya müsabiqələrinin qaliblərinin müəssisələrə yatırdıqları investisiyaların həcmi 18,9 milyon manat təşkil edib. Bu barədə Dövlət Komitəsinin sədri Kərəm Həsənov bildirib.
"Bu investisiyalar müəssisələrin istehsal potensialının gücləndirilməsinə, bu məqsədlə müasir avadanlıqların alınmasına, qabaqcıl texnologiyaların tətbiqinə, ekoloji problemlərin aradan qaldırılmasına və əməkdaşların sosial vəziyyətinin yaxşılaşdırılmasına yönəlib", - Həsənov deyib.
İlin birinci yarısında 360 obyekt və kiçik müəssisə özəlləşdirilib, bunlardan 201-i Bakıda yerləşir. İlk yarımildə 260 obyektin yerləşdiyi torpaq sahələri özəlləşdirilib.
Hesabat dövründə dövlət müəssisələrinin bazasında təxminən 10 səhmdar cəmiyyət yaradılıb. 30 hərracda 20 səhmdar cəmiyyət özəlləşdirilib.
70 SC tərəfindən dövlətə məxsus səhmlər üzrə dividendlər dövlət büdcəsinə ödənilib.
İyulun 29-na olan rəsmi məzənnə 0,8036 AZN/USD təşkil edir.