Azərbaycan, Bakı, 9 avqust /Trend, müxbir İ.Xəlilova/
Aİ Şurasının mayın 10-da üç Qafqaz ölkəsinə verdiyi mandat əsasında assosiativ razılaşmanın bağlanması haqqında Azərbaycan hökuməti və Avropa Komissiyası arasında danışıqların ikinci raundu oktyabrın 4-5-də Brüsseldə keçiriləcək. Bu barədə bazar ertəsi Azərbaycan xarici işlər nazirinin müavini Mahmud Məmmədquliyev deyib.
"Aİ Azərbaycana 11 fəsildən ibarət məsələlər siyahısını təqdim edib ki, onların da əksəriyyəti iqtisadi xarakterlidir", - Məmmədquliyev bildirib.
Assosiativ üzvlük haqqında danışıqların ilk raundu 2010-cu il iyulun 16-da Bakıda keçirilib. Assosiativlik razılaşması Azərbaycan ilə Aİ arasında siyasi dialoq və iqtisadi əməkdaşlıq üçün çərçivə sənədidir.
Aİ razılaşmanı Cənubi Qafqazın hər üç ölkəsi ilə ayrı-ayrılıqda bağlamağı nəzərdə tutur və onun məzmunu Aİ ilə əməkdaşlığın dərinliyindən asılı olacaq. Bundan başqa, Avropa İttifaqı ölkələri ilə viza rejiminin sadələşdirilməsi üzrə ayrıca razılaşmanın imzalanması nəzərdə tutulub.
Assosiativlik razılaşmaya dörd istiqamət - siyasi dialoq, o cümlədən, təhlükəsizlik məsələləri, ədliyyə və insan hüquqlarının müdafiəsi, iqtisadi və sosial-humanitar, ticarət məsələləri daxildir.
"Son istiqamət gələcəkdə Azərbaycan məhsullarının Aİ-yə ixracına şərait yaradacaq. Biz Aİ ölkələrinə bir neçə min məhsul növünün rüsumsuz ixracı üzrə güzəştlərdən artıq istifadə edirik, lakin təəssüf ki, bu məsələdə başlıca problem malların keyfiyəti olaraq qalır", - danışıqlar çərçivəsində Məmmədquliyev deyib.
Onun sözlərinə görə, Avropa İttifaqı Azərbaycanın Ümumdünya Ticarət Təşkilatına daxil olmasına tərəfdardır. "Odur ki, biz bu məsələləri (ticarət rejiminə aid olan) ikitərəfli səviyyədə tənzimləyirik", - nazir müavini qeyd edib.
2010-cu ildə assosiativ razılaşma haqqında daha iki görüşün keçirilməsi gözlənilir. Bunlardan biri oktyabrda Brüsseldə, digəri isə dekabrda Bakıda keçiriləcək.
Assosiativlik haqqında gələcək razılaşma 1995-ci ildə Azərbaycan və Aİ arasında imzalanmış tərəfdaşılq və əməkdaşlıq razılaşmasını əvəz edəcək və prioritet istiqamətlər üzrə əməkdaşlığın daha da dərinləşdirilməsini nəzərdə tutur.
2009-cu il sentyabrın 30-da üç Cənubi Qafqaz ölkəsinin xarici işlər nazirləri Brüsseldə Cənubi Qafqaz ölkələri ilə əməkdaşlıq haqqında Aİ Şurasının illik sessiyasında iştirak ediblər. Bu görüşdə Cənubi Qafqaz ölkələrinin münaqişələrin həlli və hər üç ölkədə daxili islahatların aparılması üçün təsirli stimul olan Aİ-yə assosiativ üzvlüyün perspektivləri barədə qərar qəbul olunub.
