Azərbaycan, Bakı, 19 avqust /Trend, müxbir N.İsmayılova/
2010-cu ilin birinci yarısında Azərbaycanın valyuta bazarının həcmi ötən ilin müvafiq dövrü ilə müqayisədə 0,1 faiz artaraq 8,801 milyard manat olub. Bu barədə Mərkəzi Bankın maliyyə sabitliyi üzrə açıqlanan hesabatında deyilir.
Qeyri-mütəşəkkil valyuta bazarında əməliyyatların həcmi 13,2 faiz və ya 998,8 milyon dollar artaraq 8591,2 milyon dollara çatıb və daxili valyuta bazarının həcminin 97,6 faizini təşkil edib.
Bankdaxili dəyişmə əməliyyatlarının həcmi 3734,4 milyon dollara çataraq, qeyri-mütəşəkkil valyuta bazarının 43,5 faizini təşkil edib.
Banklararası qeyri-mütəşəkkil valyuta bazarının həcmi (BEST) 82,5 faiz və ya 989,4 milyon manat azalaraq, 209,6 milyon manat (daxili valyuta bazarının həcminin 2,3 faizi) təşkil edib.
Mərkəzi Bank tərəfindən ilin birinci yarısında 598,4 milyon dollar məbləğində intervensiya həyata keçirilib ki, bu da ötən ilin müvafiq dövrünün göstəricisindən 1,8 dəfə azdır. Tələb və təklifin adekvat tənzimlənməsi nəticəsində, hesabat dövründə manatın dollara nisbətdə rəsmi məzənnəsi yalnız 0,04 faiz ucuzlaşıb.
Milli valyutaya inamın artması banklarda fiziki və hüquqi şəxslər tərəfindən nağd dollarların alış həcminin 31,9 faiz azalaraq, 1838,9 milyon manata çatması da təsdiq edir. Bundan başqa, rəsmi və bazar məzənnəsi arasında fərq 1,9 dəfə azalıb.