Azərbaycan, Bakı, 29 sentyabr /Trend, müxbir E.İsmayılova/
Azərbaycan kollektiv investisiya sahəsində aparıcı beynəlxalq təcrübəni öyrənməyə başlayıb. Burada məqsəd "İnvestisiya fondları haqqında" qanun layihəsinin qəbulunda beynəlxalq təcrübənin tətbiqindən ibarətdir. Bu barədə çərşənbə günü Azərbaycan Qiymətli Kağızlar üzrə Dövlət Komitəsinin sədri Rüfət Aslanlı deyib.
Onun sözlərinə görə, bu məqsədlə Bakıda "Kollektiv investisiyalar: beynəlxalq təcrübə və imkanlar" mövzusunda beynəlxalq konfrans keçirilib.
"Konfrans beynəlxalq təcrübənin və bazara yeni alətlərin çıxarılmasına və kiçik investorların böyük investorlara çevrilməsinə kömək edən kollektiv investisiyanın tətbiqinin müxtəlif modellərinin öyrənilməsinə xidmət edir", - Aslanlı bildirib.
Onun sözlərinə görə, konfrans "İnvestisya fondları haqqında" qanunun tətbiqinə və qəbuluna hazırlıq məqsədi daşıyır və bunu nəzərə alaraq, bu sahədə beynəlxalq təcrübə öyrənilib və Azərbaycanın uyğunlaşma modeli müzakirə edilib.
Milli Məclisdə "İnvestisya fondları haqqında" qanun layihəsinin ikinci oxunuşda müzakirəsi payız sessiyasının iclasları zamanı gözlənilir.
Yeni qanunda Azərbaycanda payçı səhmdar investisiya fondlarının yaradılması, eləcə də intervallı payla pay investisiya fondlarının açılması və bağlanılması nəzərdə tutulub. İnvestisiya fondlarının fəaliyyəti Qiymətli Kağızlar üzrə Dövlət Komitəsi tərəfindən lisenziyalaşdırılacaq.
Qanun layihəsinə əsasən, Azərbaycanda ölkə vətəndaşlarına ölkənin səlahiyyətləri xaricində xidmətlər göstərəcək xarici investisiya fondlarının nümayəndəliklərinin açılmasına icazə verilir. Bununla yanaşı, xaricdə belə fondların fəaliyyətini tənzimləyən mexanizmlər Azərbaycanda qəbul edilən mexanizmlərdən zəif olmamalıdır ki, bu da Azərbaycan investorlarının müdafiəsi üçün əsas tələbdir.
İnvestisiya fondları fond birjalarında əməliyyatlar apara bilən peşəkar menecerlərin idarə etməli olduqları özünəməxsus maliyyə müəssisəsidir. İnvestisiya fondları öz vəsaitlərini müxtəlif maliyyə aktivlərinə - səhmlərə, müəyyən edilmiş gəlirlə borc alətlərinə yerləşdirə bilərlər.
İnvestisiya fondlarına banklar kimi, müəyyən edilmiş gəlirləri açıqlamaq qadağan edilir, belə ki, onlar vəsaitləri riskli aktivlərə, gəlirliliyi dividendlərdən asılı olan səhmlərə yerləşdirirlər ki, bununla əlaqədar zəmanət vermək düzgün olmaz.
Qanun layihəsinin hazırlanmasında 30 ölkənin təcrübəsi və Avropa İttifaqının direktivləri öyrənilib.
"İnvestisiya fondları haqqında" qanun layihəsinin beynəlxalq ekspertizası məqsədilə "First Initiative" texniki kömək proqramı çərçivəsində ekspertlər cəlb edilib.
