Azərbaycan, Bakı, 15 oktyabr /Trend, müxbir N.İsmayılova/
Oktyabrın 16-dan 31-dək Dünya Bankının (DB) missiyası Bakıda olacaq. Missiyaya bankın maliyyə proqramları və DB-nin Cənubi Qafqazda maliyyə məsələləri üzrə əlaqələndiricisi Maykl Edvards rəhbərlik edəcək. Bu barədə cümə günü bankın Bakı nümayəndəliyindən məlumat verilib.
Səfərdə başlıca məqsəd maliyyə xidmətlərinin inkişafı layihəsinin başa çatması ilə ölkənin maliyyə sektorunda bankın layihələrinin həyata keçirilməsi, maliyyə bazarının inkişafı layihəsinin hazırlanması, eləcə də gedişi, həmçinin istehlakçıların hüquqlarının və maliyyə savadlılığının artırılması proqramlarının gedişi ilə tanışlıqdır.
"Kapital bazarının inkişafı layihəsinin müzakirəsi çərçivəsində layihənin detalları və parametrləri razılaşdırılacaq və yaxın bir neçə ay ərzində ona yekun vurulması gözlənilir", - DB-dən bildirilib.
Əsasən ölkənin poçt sisteminin modernləşdirilməsindən ibarət olan "Maliyyə xidmətlərinin inkişafı" layihəsinin ümumi dəyəri 17,5 milyon dollar təşkil edir. Onun 12,25 milyon dolları DB-nin kreditlərinin, yerdə qalan hissəsi isə Azərbaycan hökumətinin payına düşür. İsveçrə hökuməti də layihənin həyata keçirilməsinə 612 min dollar həcmində texniki yardım göstərir. Layihə çərçivəsində "Azərpoçt"un fəaliyyətinin maliyyə xidmətlərinin göstərilməsi sahəsində yaranan risklərin idarə olunması tələblərinə uyğunlaşdırılması nəzərdə tutulub.
DB Azərbaycanda kapital bazarının inkişafına 5-10 milyon dollar vəsait ayırmaq imkanlarını nəzərdən keçirir. Bu layihənin maliyyələşdirilməsi Beynəlxalq İnkişaf Assosiasiyasının (DB qrupuna daxildir) Azərbaycan üçün 2011-ci maliyyə ilində 73 milyon dollar məbləğində müəyyən edilmiş kvotasından güzəştli kreditin verilməsi mümkündür.
Kapital bazarının inkişafı layihəsinin həyata keçirilməsinə 2010-cu ilin sonlarında başlamaq planlaşdırılır. Hazırda DB və müxtəlif beynəlxalq donor təşkilatları tərəfindən maliyyələşdirilən "First Initiative" proqramı ilə layihənin dizaynının dəqiqləşdirilməsi aparılır. Ümumilikdə Qiymətli Kağızlar üzrə Dövlət Komitəsi (QKDK) Azərbaycanın kapital bazarının inkişafı strategiyasının hazırlanmasında maliyyə və texniki dəstək haqqında "First Initiative" proqramı ilə razılaşma əldə edib. Kapital bazarının modernləşdirilməsi layihəsi bu strategiyanın hazırlanmasına irimiqyaslı texniki yardımın göstərilməsini nəzərdə tutur.
Digər layihə çərçivəsində Azərbaycan Mərkəzi Bankı yayda DB ilə birgə maliyyə istehlakçıları hüquqlarının müdafiəsi və maliyyə sahəsində biliklərin artırılması üzrə hesabat hazırlayıb. Bu, Azərbaycanda bu qəbildən olan ilk hesabatdır və həm qanunverici-hüquqi strukturu, maliyyə nəzarətini, həm də mikromaliyyə sektorunu əhatə edir. Bu, hesabatın ilkin variantıdır və gələcəkdə ona əlavə və dəyişikliklərin ediləcəyi gözlənilir.
Avropa və Asiyada artıq doqquz belə hesabat hazırlanıb.