Azərbaycan, Bakı, 16 oktyabr /Trend, müxbir A.Axundov/
Azərbaycan Dövlət Gömrük Komitəsinin məlumatına görə, yanvar-sentyabrda nəqliyyat vasitələri ilə 33,453 milyon ton tarnzit, idxal və ixrac yükləri daşınıb ki, bu da 2009-cu ilin analoji dövründə daşınan yüklərin həcmindən 8,71 faiz çoxdur. Bu barədə şənbə günü komitədən bildirilib. Bu dövr ərzində ixrac 28,031 milyon ton, idxal isə 5,421 milyon ton təşkil edib.
Bu ilin doqquz ayı ərzində dəniz nəqliyyat vasitələri ilə 265,3 min ton yük, dəmiryol vasitəsilə 2,54 milyon ton, avtomobil vasitəsilə 400,9 min ton, hava nəqliyyatı ilə 194,9 min ton yük ixrac olunub, boru kəmərləri vasitəsilə nəql isə 24,625 milyon ton təşkil edib.
Dəniz nəqliyyatı ilə 552,3 min ton yük, dəmiryol nəqliyyatı vasitəsilə 3,697 milyon ton, avtomobil nəqliyyatı ilə 1,14 min ton və hava nəqliyyatı vasitəsilə isə 15,3 min ton yük idxal edilib.
Azərbaycan ərazisi ilə doqquz ay ərzində tranzitlə 6,94 milyon ton yük daşınıb ki, bu da 2009-cu ilin müvafiq dövründən 65,17 faiz, yaxud 2,737 milyon ton çoxdur.
Azərbaycan ərazisindən tranzitlə İsveçrəyə 1,27 milyon ton yük, Bermud adalarına 2,414 milyon ton, İtaliyaya 1,346 milyon ton, Gürcüstana 391 min ton, Türkmənistana 140,3 min ton, Tacikisitana 321,8 min ton, Rusiyaya 148,7 min ton, Türkiyəyə 109,6 min ton, İrana 391 min ton, Əfqanıstana isə 297,8 min ton yük daşınıb.
