Azərbaycan, Bakı, 3 noyabr /Trend, müxbir A.Axundov/
Azərbaycanda dondurulmuş quş ətinin satışına qadağanın qoyulması nəzərdən keçirilmir. Bu barədə çərşənbə günü Respublika Gigiyena və Epidemiologiya Mərkəzinin (RGEM) qidalanma gigiyenası şöbəsinin mudiri İmran Abdullayev bildirib.
"Azərbaycanda buna ehtiyac yoxdur, belə ki, bunun üçün elmi əsas yoxdur", - Abdullayev qeyd edib.
İstehlakçıların hüquqlarının qorunması sahəsində nəzarət üzrə Federal Xidmətin (Rusiya) rəhbəri həkim Gennadi Onişenko çərşənbə günü İnterfaks-a bildirib ki, çox dondurulmuş quş ətinin pərakəndə şəbəkələrdə satışına və emalda istifadəsinə qadağanın qoyulması 2011-ci il yanvarın 1-dən etibarən həm milli istehsalçılara, həm də ixdalçılara aid ediləcək.
"Söhbət tam imtinadan getmir. Biz Rusiya bazarında yerli və ya gətirimiş ət olmasından asılı olmayaraq, çox dondurulmuş quş ətinin satışını qadağan edirik", - o qeyd edib.
Onun sözlərinə görə, quş ətinin mənfi 10 və 20 dərəcəyədək dondurulmamış vəziyyətdə satışı zamanı ətdəki bütün faydalı maddələr saxlanılır.
"Çox dondurulma və istifadədən əvvəl donmanın açılması qida xüsusiyyətlərini kəskin şəkildə azaldır", - Onişenko bildirib.
Bu gün Azərbaycan yerli istehsal sayəsində quş məhsullarına olan daxili tələbatının demək olar ki, 74 faizini ödəyir. Hazırda ölkədə 80 min ton quş ətindən istifadə olunur, gələcəkdə isə bu həcmin artacağı gözlənir. Bu, əti ixrac etməyə də imkan verir. Yerli məhsuldan istifadə əsasən "çox dondurulmanı" tələb edən idxal məhsulundan imtina etməyə imkan verəcək.
Azərbaycan İqtisadi İnkişaf Nazirliyi yanında Sahibkarlığa Kömək Milli Fondunun icraçı direktoru Şirzad Abdullayevin sözlərinə görə, 2011-ci ilin sonunadək Azərbaycan damazlıq yumurtalara və quş ətinə olan daxili tələbatını tam ödəyə biləcək.
