Qazaxıstan, Astana, 17 noyabr /Trend, müxbir А.Maratov/
Qazaxıstanda aviazavodun inşası layihəsi vaxtında başa çatacaq. Bu barədə çərşənbə günü Astanada mətbuat konfransında nəqliyyat və kommunikasiya naziri Abelqazı Kusainov deyib.
"Hazırda bu obyektə yanaşma, yol qurulur. Və düşünürəm ki, mövcud layihə öz vaxtında həyata keçiriləcək", - Kusainov deyib. Zavodun dəyəri 2 milyard təngə təşkil edir, onun 300 milyonu zavod sahiblərinin payına düşür.
Avqustda Qazaxıstanın Karaqanda vilayətində aviasiya zavodunun tikinti yerində rəmzi daşın qoyuluşu təşkil olunub. 2015-ci ilə qədər Qazaxıstanda kənd təsərrüfatı yönümlü hava gəmiləri bazarının tutumunu 500 ədədə çatdırmaq planlaşdırılır. Bununla bağlı mövcud zavodun inşası bu tapşırığın praktiki başlanğıcı ilə həyata keçirilir.
"Layihənin təşəbbüskarı "AK Naviqator" şirkətidir, onun həyata keçirilməsi üçün isə "KazAviaSpektr" MMC yaradılıb.
Tikintinin başa çatması 2011-ci ilə planlaşdırılır. 2012-ci ildə zavod ölkənin Karaqanda vilayəti və digər regionlarda aqrosənaye kompleksi üçün 50 "Fermer-2" və "Fermer-500" təyyarələrini buraxacaq. Bu təyyarələr kənd təsərrüfatı işlərinin aparılması, həmçinin, sahələrə kimyəvi maddələrin səpilməsi üçün təyin olunub.
Şirkətin planlarında çoxfunksiyalı "Sunkar" təyyarəsinin hazırlanması da var.