...

Azərbaycanın sığorta şirkəti onlayn satış sisteminə keçəcək

Biznes və iqtisadiyyat xəbərləri Materials 2 Dekabr 2010 17:25 (UTC +04:00)

Azərbaycan, Bakı, 2 dekabr /Trend, müxbir Ü.İsmayılova/

2011-ci il yanvarın 1-dən Azərbaycan-Türkiyə "Başak-İnam Sığorta Şirkəti" sığorta polisləri satışının yeni avtomatlaşdırılmış sistemini tətbiq etmək fikrindədir. Bu barədə cümə axşamı şirkətin idarə heyəti sədrinin köməkçisi Hikmət Allahverdiyev məlumat verib.

"Yeni satış sistemi şirkət tərəfindən yaradılan avtomatlaşdırılmış idarəetmə sistemi çərçivəsində tətbiq edilir", - Allahverdiyev bildirib.

Onun sözlərinə görə, şirkət birinci mərhələdə KASKO, yanğından və bədbəxt hadisələrdən sığorta üzrə polislərini onlayn rejimdə satacaq.

Şirkətin avtomatlaşdırılmış idarəetmə sistemi beynəlxalq standartlara uyğundurvə dünyanın bir çox iri sığorta şirkətlərində istifadə olunur. Bu sistem sığorta şəhadətnamələrinin, mühasibat hesabatlarının hazırlanmasının buraxılışını, təkrar sığorta əməliyyatlarının aparılmasını, sığorta hadisəsi yerində ödənişlərin hesablanmasını və digər prosesləri avtomatlaşdırılmış qaydada həyata keçirməyə imkan verir. Sistem şirkətə 500 istifadəçi ilə eyni vaxtda bütün əməliyyatları həyata keçirməyə imkan verir.

"Başak-İnam Sığorta Şirkəti"nin avtomatlaşdırılmış idarəetmə sistemi yaxın on il ərzində şirkətin bütün tələbatlarını ödəməyə imkan verir", - Alalhverdiyev deyib.

"Başak-İnam Sığorta Şirkəti"nin səhmdarları Groupama Sigorta A.Ş. (49 faiz) və azərbaycanlı təsisçidir. Birgə sığorta şirkəti 1996-cı ildən fəaliyyət göstərir. Şirkət 31 növdə sığorta xidməti göstərir. Şirkətin nizmanamə kapitalı 2 milyon manat təşkil edir.

Dekabrın 2-nə olan rəsmi məzənnə 0,8 AZN/USD təşkil edir.

Xəbər lenti

Xəbər lenti