Azərbaycan, Bakı, 23 dekabr /Trend, müxbir İ.Xəlilova/
AzDRES - İmişli elektrik ötürücü xəttinin tikintisi layihəsinin podratçısı olan Çinin CNEC şirkəti bilavasitə işlərə başlayıb. Bu barədə Trend-ə cümə axşamı KfW Almaniya İnkişaf Bankının Bakı ofisinin rəhbəri Natiq Abdullayev deyib. Layihə üzrə subpodratçı qismində Azərbaycanın "Azenko" şirkəti çıxış edir.
"Tikinti işlərinin 2011-ci ilin sonunadək başa çatdırılması planlaşdırılır", - Abdullayev bildirib.
Layihə AzDRES-dən İmişliyə qədər uzunluğu 195 km olan elektrik ötürücü xətlərinin tikintisini nəzərdə tutur. Həmçinin Goranboyda yarımstansiyanın tikintisi və ayrıca oyuğun yaradılması yolu ilə 330kVt gücü olan İmişli yarımstansiyasına elektritk enerjisi verilməsi sahəsini genişləndirmək planlaşdırılır. Elektrik ötürucu xəttinin tikintisindən sonra xəttin gücü 200 mV-dan 700 mV-a qədər artacaq.
Layihənin maliyyələşdirilməsi üçün Almaniyanın KfW bankı layihənin bütün dəyərini ödəyərək, 30 milyon avro ayırıb. Kredit iki ili güzəştli olmaqla, 12 il müddətinə veriləcək. Bu enerji layihəsinin şərtləri Almaniyanın eletrik enerjisinə qənaət Fondu və elektrik enerjisindən effektiv istifadə üzrə Almaniya Federal hökuməti tərəfindən qrantın verilməsi səbəbindən yumşaldılıb. Nəticədə bankın maliyyələşdirilməsinin bir hissəsi qrantdan ibarətdir, əks halda, kredit yüksək faiz dərəcəsi ilə 8-10 il müddətinə verilməli idi.
CNEC (China Nuclear Engineering & Construction) Çinin elektrik stansiyaların tikintisi ilə məşğul olan böyük şirkətidir.
