Azərbaycan, Bakı, 12 yanvar /Trend, müxbir Ü.İsmayılova/
Azərbaycanda 2015-ci ildən etibarən özəl pensiya fondlarının hesablarında vəsaitlərin toplanması prosesi başlayacaq. Bu barədə çərşənbə günü jurnalistlərə Dövlət Sosial Müdafiə Fondunun rəhbəri Səlim Müslümov deyib.
"Bu tədbir "2009-2015-ci illərdə sığorta pensiya sisteminin inkişafı üzrə Dövlət Proqramı"nda nəzərdə tutulub", - Müslümov qeyd edib.
Onun sözlərinə görə, müvafiq qanunvericilik bazasının hazırlanması 2012-2013-cü illərə planlaşdırılıb.
Bundan əvvəl Müslümovun dediyi kimi, Azərbaycanda yaradılan pensiya sığorta sistemi Almaniya pensiya sisteminin analoqu olaraq üçpilləli sistemdir. Birincə pilləyə dövlətin həyata keçirdiyi icbari pensiya sığortası daxildir. İkinci pilləyə real investisiyalarla məşğul olan icbari pensiya sığorta sisteminin bir hissəsi daxildir ki, bu da bank hesablarına sosial sığorta haqlarının bir qisminin qoyulmasını, müxtəlif maliyyə alətlərinə yerləşdirməni və əldə olunan gəlirlər sayəsində pensiyaların artırılmasını nəzərdə tutur. Üçüncü pillə özəl pensiya fondlarının yaradılmasını, bu fondların fəaliyyəti nəticəsində pensiyaçılar tərəfindən əlavə pensiyaların alınmasını nəzərdə tutur.