Azərbaycan, Bakı, 13 yanvar /Trend, müxbir N.İsmayılova/
2010-cu il yanvarın 1-nə "Texnika Bank"ın aktivləri dekabra nisbətdə dörd faiz artaraq 506,014 milyon manat təşkil edib. Bu barədə cümə aşxamı bankdan məlumat verilib. Aktivlər üzrə gəlir (ROA) 2,57 faiz, kapital üzrə (ROE) isə 19,25 faiz təşkil edib.
Bankın nizamnamə kapitalı 53,69 milyon manat, ümumi kapitalı 64,26 milyon manat təşkil edib.
Yanvarın 1-nə bankın depozit portfeli dekabra nisbətdə 6,6 faiz artaraq 255,747 milyon manat olub. Fiziki şəxslərin əmanətləri 182,95 milyon manat təşkil edib. Bankın ümumi öhdəlikləri 422,49 milyon manat səviyyəsində olub.
Bankın kredit portfeli il ərzində 0,9 faiz azalaraq 336,63 milyon manat təşkil edib, problemli kreditlərin payı (ödənişlərin müddəti 90 günü ötən zaman) isə 5,24 faizə çatır. "Texnika Bank" 27,27 milyon manat istehlak kreditləri verib.
Hesabat dövrü ərzində bankın gəlirləri 63,83 milyon manat, faizli gəlirləri 49,33 milyon manat, faizsiz gəlirləri isə 14,5 milyon manat təşkil edib. Bankın xərcləri 51,39 milyon manat olub.
Yanvarın 1-nə olan məlumat əsasən, bankın xalis gəliri 12,04 milyon manat təşkil edib.
Dekabrın sonuna bankın plastik kartlarının sayı 49 106 ədəd təşkil edib. "Texnika Bank" ölkə üzrə 60 bankomat, 115 POS-terminal quraşdırıb. Bankın 35 filialı və beş şöbəsi var.
"Texnika Bank" ölkənin bank bazarında 1993-cü ildən fəaliyyət göstərir, 2007-ci ilədək 100 faizli Azərbaycan bankı olub. Bu gün bankın majoritar səhmdarı kimi "World Wines" şirkəti çıxış edir. Şirkət bankın səhmlərinin 75 faizinə sahibdir. Bankın Müşahidə Şurasının sədri Etibar Əliyev səhmlərin 15 faizinə, ABŞ-ın "Kazimir Investment Caspian Fund" holdinqi isə səhmlərin 10 faizinə nəzarət edir.
Yanvarın 13-nə olan rəsmi məzənnə 0,7975 AZN/USD təşkil edir.
