Azərbaycan, Bakı, 10 fevral /Trend, müxbir N.İsmayılova/
"Bank Melli İran"ın Bakı filialı öz tarif siyasətini kredit və depozitlər üzrə faiz dərəcələrinin azaldılmasına doğru dəyişib. Bu barədə cümə axşamı bank filialının direktor müavini Anar İbrahimov bildirib.
"Bank depozitlər üzrə dərəcələri azaldıb. İndi bir il müddətinə dollar və manatla əmanət qəbul edilərkən dərəcə 9 faiz, avro ilə isə 4 faiz təşkil edir", - İbrahimov bildirib.
Onun sözlərinə görə, əgər əvvəllər bank depozitləri üç valyutada - manat, dollar və avroda bir ildən üç ilədək müddətə qəbul edirdisə, indi müddətlər dəyişib və üç aydan bir ilədək müddət arasında dəyişir. Bundan əvvəl bank avroda illik depozitləri yeddi faiz, manat və dollarda isə 11 faizlə cəlb edirdi. Dollar və manatla yarım il müddətinə əmanətlər üzrə yeni dərəcələr illik 6,2 faiz, avroda - 2 faiz, üç ay müddətinə isə müvafiq olaraq 3,2 və 1,5 faiz təşkil edir.
"Kreditlər üzrə dərəcələr də azaldılıb. Əgər əvvəllər onlar 21-dən 27 faizədək təşkil edirdisə, bu gün onlar 18-21 faiz səviyyəsindədirlər", - o, deyib.
Bank üç ilədək müddətə kreditlər verir, eləcə də iki il müddətinə illik 22-25 faiz dərəcəsi və 30 faiz ilkin ödənişlə avtomobil kreditləri də verir. Kreditin maksimum məbləği 10 min dollardır.
"Bank Melli İran" İranın ilk milli bankıdır. O, 1927-ci ildə Məclisin (İran parlamentinin) sərəncamı ilə yaradılıb və o vaxtdan İranın ən nüfuzlu banklarından biridir.
"Bank Melli İran" İranda və Yaxın Şərqdə 3 300 şöbə və 43 min əməkdaşa malik ən iri kommersiya bankıdır. Bank 18 beynəlxalq filiala və 11 ölkədə xidmət məntəqəsinə malikdir. "Bank Melli İran"ın Bakı filialı 1993-cü ildə yaradılıb.
Fevralın 10-na olan rəsmi məzənnə 0,7961 AZN/USD təşkil edir.