Azərbaycan, Bakı, 25 fevral /Trend, müxbir N.İsmayılova/
Bakı-Tbilisi-Qars dəmiryol magistralının yenidən qurulması layihəsi çərçivəsində Gürcüstandan keçən hissənin tikintisinin maliyyələşdirilməsi üçün əlavə 550 milyon dolların verilməsi məsələsi ilə bağlı müzakirələr aparılır. Trend-in məlumatına görə, bu barədə cümə günü Azərbaycanın maliyyə naziri Samir Şərifov jurnalistlərə bildirib.
"Layihə təkcə Azərbaycan üçün deyil, eləcə də ümumilikdə region, o cümlədən Gürcüstan üçün vacibdir. Və indi əlavə maliyyələşmənin hansı formada olacağı və necə təşkil ediləcəyi barədə müzakirələr aparılır", - Şərifov bildirib.
Əvvəllər xəbər verildiyi kimi, Bakı-Tbilisi-Qars dəmiryolunun Gürcüstandan keçən hissəsinin tikintisinə Azərbaycan hökuməti əlavə olaraq 550 milyon dollar verməyə hazırdır. Gürcüstandan keçən hissə üçün Azərbaycan tərəfdən ölkənin Dövlət Neft Fondunun vəsaitlərindən 200 milyon dollar artıq ayrılıb. Bu kreditin vəsaitləri illik bir faiz olmaqla 25 il müddətinə nəzərdə tutulub.
İkinci kredit çərçivəsində faiz dərəcəsinin beş faizədək artırılacağı gözlənilir.
Bakı-Tbilisi-Qars layihəsi çərçivəsində dəmiryol magistralının yeni 105 km-lik qolunun tikintisi də planlaşdırılır. Bunun 76 km-i Türkiyə, 29 km-i isə Gürcüstan ərazisindən keçəcək. Bundan əlavə, nəqletmə gücünü ildə 15 milyon ton yükə çatdırmaq üçün Gürcüstanda Axalkalaki-Marabda-Tbilisi dəmiryolunun 183 km-lik hissəsi yenidən qurulacaq. Axalkalakidə Gürcüstanda mövcud olan dəmiryol təkərlərinin Avropa standartlarına uyğun təkərlərlə əvəz edilməsi üzrə məntəqələrin tikilməsi də planlaşdırılır.
Bundan əvvəl Azərbaycanın nəqliyyat naziri Ziya Məmmədovun verdiyi məlumata görə, tikinti işlərinin 2012-ci ilin birinci yarısında başa çatdırılması planlaşdırılıb. Lakin layihənin həyata keçirilmə müddətinin razılaşdırılmasına baxmayaraq, tərəflər prosesin sürətləndirilməsi və işlərin böyük hissəsinin 2011-ci ilin sonunadək başa çatdırılması üzərində işləyirlər.
Dəhlizin yüksək buraxılış qabiliyyəti 17 milyon ton yük olacaq. İlkin mərhələdə bu göstərici 1 milyon sərnişin və 6,5 milyon ton yük təşkil edəcək.
