Azərbaycan, Bakı, 4 mart /Trend, müxbir N.İsmayılova/
Azərbaycan və Serbiya hökumətləri məhsul idxalçıları və ixracatçıları üçün gömrük güzəştlərinin tətbiqi imkanları ilə bağlı danışıqlar aparırlar. Bu barədə Trend-ə Bakıda Serbiya-Azərbaycan Ticarət Palatasının prezidenti Mirko Baraç deyib.
"Ümid edirəm ki, Azərbaycan Prezidenti İlham Əliyevin Belqrada səfərinə qədər bu müzakirələr nəticələr verəcək və konkret təkliflər irəli sürüləcək", - o bildirib.
Onun fikrincə, belə tədbirlər biraddımlı ola bilməz, buna görə də müəyyən qrup mallara güzəştlərin tətbiqi imkanı müzakirə edilə bilər.
"Məsələn, güzəştlər kənd təsərrüfatı mallarına, xüsusilə də nar, fındıq və Serbiyada artıq öz satış bazarı olan digər məhsullara aid ola bilər. Bütün bunlara əlavə olaraq, biz müstəsna olaraq təkcə Serbiya-Azərbaycan münasibətlərinə baxmırıq, bizim üçün ümumilikdə keçmiş sovet regionu maraqlıdır", - o qeyd edib.
Azərbaycanla Serbiya arasında xarici ticarət dövriyyəsi 2010-cu ilin yekunları üzrə 1784,4 min dollar təşkil edib ki, bunun 99,8 faizi idxalın payına düşür. Ötən il Serbiyadan 1781,2 min dollarlıq mal gətirilib, Azərbaycan mallarının ixracı isə 3,2 min dollar səviyyəsindədir.