...

2010-cu ildə Azərbaycan 1 milyard dollardan çox məbləğdə 5 kredit sazişi imzalayıb

Biznes və iqtisadiyyat xəbərləri Materials 10 Mart 2011 16:32 (UTC +04:00)

Azərbaycan, Bakı, 10 mart /Trend, müxbir N.İsmayılova/

Azərbaycan müxtəlif beynəlxalq maliyyə-kredit təşkilatları, eləcə də donor ölkələrlə əməkdaşlığı genişləndirir. Nəticədə 2010-cu ildə ölkə iqtisadiyyatı üçün əhəmiyyət kəsb edən layihələrin maliyyələşdirilməsi məqsədilə ümumi dəyəri təxminən 1,13 milyard dollar olan beş kredit sazişi imzalanıb. Bu barədə hökumətin parlamentə təqdim etdiyi 2010-cu ilin yekunları üzrə hesabatında deyilir.

Kreditlər - 241,6 milyon dollar Dünya Bankından, 198,4 milyon dollar İslam İnkişaf Bankından, 380,4 milyon dollar Çexiya "Komerční banka"dan, 284,4 milyon dollar Çexiya "Česká exportní banka"dan, 26,5 milyon dollar OPEC-in Beynəlxalq İnkişaf Fondundan cəlb edilib.

Ümumilikdə ölkə müstəqilliyini bərpa etdikdən sonra 1994-2010-cu illər ərzində ümumi məbləği 8,92 milyard dollar olan 142 kredit sazişi imzalanıb. Onlardan 73 layihənin həyata keçirilməsi artıq başa çatıb, qalanı icra prosesindədir.

2011-ci il yanvarın 1-nə xarici borcların ümumi həcmindən 4,67 milyard dollar istifadə edilib. Bu, imzalanan kredit sazişlərinin ümumi həcminin 52,3 faizini təşkil edir. 2010-cu ildə 735,1 milyon dollardan istifadə edilib. 2010-cu il yanvarın 1-nə dövlətin xarici borcu 3421,8 milyon dollar təşkil edib, halbuki 2011-ci il yanvarın 1-nə 3857,3 milyon dollar olub.

İmzalanan sazişlər üzrə investisiya layihələrinin həyata keçirilməsinə 8563,4 milyon dollar cəlb edilib. Bundan 4310,9 milyon dollar istifadə edilib.

İlin əvvəlində dövlətin xarici borcunun strukturu belə olub: elektrik enerjisi sektorunun bərpasına və inkişafına ümumi həcmdən 36,25 faiz, nəqliyyat infrastrukturunun və yol tikintisinin bərpasına 31,5 faiz, iqtisadi islahatlara 7,84 faiz, kənd təsərrüfatına 3,49 faiz, su təchizatına və meliorasiyaya 8,52 faiz, sosial sahələrə 4,31 faiz, neft, qaz və kimyaya 5,5 faiz, digər sahələrə 2,59 faiz ayrılıb.

2010-cu ildə ölkədə elektrik enerjisi sahəsində 8, nəqliyyat sektorunda 15, su təchizatı, meliorasiya və irriqasiya sahəsində 9, sosial sahədə 10 və kənd təsərrüfatında 5 layihənin həyata keçirilməsi davam etdirilib.

2010-cu ildə əsas borcdan 249,6 milyon dollar qaytarılıb. Xarici borca xidmətin göstərilməsi ilə əlaqədar faiz ödənişlərinə 66,9 milyon dollar yönəldilib.

2011-ci il yanvarın 1-nə olan vəziyyətə görə, imzalanan sazişlər üzrə ayrılan bütün kreditlərin xüsusi çəkisi ÜDM-in 21,5 faizini, dövlət borcu olan kreditlərin istifadə olunan hissəsi 9,3 faiz təşkil edib.

Xəbər lenti

Xəbər lenti