Azərbaycan, Bakı, 16 mart /Trend, müxbir T.Cəfərov/
İran Azərbaycanla sərhəddə əhalinin gediş-gəlişi üçün şəraitin yaxşılaşdırılması məqsədilə birgə nəzarət-buraxılış məntəqələrinin yaradılmasını təklif edir. Bunu Trend-ə İranın Azərbaycandakı səfirliyinin konsulluq şöbəsinin müdiri Behruz Zare Mirzaye bildirib.
Hazırda İran və Azərbaycan arasında iki - Astara və Biləsuvar sərhəd-buraxılış məntəqələri fəaliyyət göstərir. Orada hər iki ölkənin gömrük orqanları ayrı-ayrılıqda yoxlanışlar aparırlar.
"Birgə nəzarət buraxılış məntəqələrinin yaradılması iki ölkə arasında gömrük qaydalarının sadələşdirilməsinə, prosedurların bərabərləşdirilməsinə, xərclərin azalmasına, yüklərin daşınması və əhalinin gediş-gəlişində gözləmələrin və vaxt itkisinin qarşısının alınmasına və ümumiyyətlə gömrük xidmətlərinin sürətlənməsinə kömək edəcək", - Mirzaye qeyd edib.Onun sözlərinə görə, birgə nəzarət-buraxılış məntəqələrinin yaradılması sərhədlərdə bürokratiyanın ləğv olunmasına səbəb olacaq.
"Son vaxtlar hər iki ölkədən əhalinin gediş-gəlişində artım müşahidə olunur. Bu, sərhəd-buraxılış məntəqələrində gözləmələrə, vaxt itkisinə və əhalinin narazılığına səbəb olur. Birgə nəzarət-buraxılış məntəqəsinin yaradılması hər iki ölkənin vətəndaşlarının ən qısa zamanda gediş-gəlişinə və mövcud narazılıqların aradan qaldırılmasına imkan verəcək", - Mirzaye vurğulayıb.
O əlavə edib ki, İran belə nəzarət-buraxılış məntəqələrinin yaradılmasını Türkiyə ilə də müzakirə edir. Müzakirələr yekunlaşıb və yaxın gələcəkdə belə məntəqələr İran və Türkiyə arasında yaradılacaq.
İran Azərbaycan vətəndaşları üçün viza rejimini birtərəfli qaydada ləğv edib və fevralın 1-dən etibarən İrana gedən Azərbaycan vətəndaşlarından viza tələb olunmur. Astara gömrük-buraxılış məntəqəsi vasitəsilə hər il 2 milyon ton məhsul daşınır və 500 min nəfərdən çox insan gedib-gəlir.