Azərbaycan, Bakı, 7 aprel /Trend, müxbir A.Axundov/
Dövlət lizinq şirkəti "Aqrolizinq" ASC 2011-ci ilin birinci rübündə hüquqi və fiziki şəxslərə 696 ədəd kənd təsərrüfatı texnikasını lizinqə verib. Bu barədə cümə axşamı şirkətin məlumatında deyilir.
Şirkətin saytında göstərilən məlumata əsasən, martda 254, fevralda 266, yanvarda 176 ədəd kənd təsərrüfatı texnikası lizinqə verilib.
İlin birinci rübündə şirkət 281 traktor, 210 kotan, 46 suvarıcı maşın, 13 kombayn, 146 ədəd digər kənd təsərrüfatı texnikasını lizinqə verib.
İlin ilk üç ayı ərzində "Aqrolizinq"dən 17 hüquqi və 384 fiziki şəxs texnikanı lizinqə alıb.
Ötən il ölkə hökuməti tərəfindən "Aqrolizinq" ASC-yə məxsus kənd təsərrüfatı üçün texnika və avadanlığın fiziki və hüquqi şəxslərə lizinqli satışına və lizinqə verilməsi qaydalarına dəyişiklilər edilib.
Yeni şərtlərə əsasən, "Aqrolizinq" Açıq Səhmdar Cəmiyyətinə məxsus kənd təsərrüfatı texnikasını və texnoloji avadanlıqları lizinqə alan hüquqi və fiziki şəxslər onun dəyərinin 10 faizini ilkin ödəniş kimi ödəməlidirlər, qalan hissəsini isə bir ildən sonra 9 il ərzində, ilkin ödənişi etdikdən bir il sonra ödəməyə başlamalıdırlar. Əvvəllər avadanlığın dəyəri 40 min manatı ötəndə ilkin ödəniş 10 faiz, avadanlığın dəyəri 40 min manata qədər olanda isə 20 faizlik ilkin ödəniş edilirdi.
Lizinqə alınan texika və avadanlığın dəyəri tam ödənildikdən sonra müqavilə qüvvədən düşür və bu texnika və ya texnoloji avadanlıq "Aqrolizinq"ə mülkiyyətin istifadəçiyə verilməsi ilə bağlı qanunvericilikdə nəzərdə tutulmuş qaydada rəsmiləşdirilir.
"Aqrolizinq" ASC Kənd Təsərrüfatı Nazirliyinin balansındadır və Azərbaycan Prezidenti İlham Əliyevin sərəncamına əsasən 23 oktyabr 2004-cü il tarixdə yaradılıb. Müəssisənin fəaliyyəti aqrar sahənin yaxşılaşdırılmasına və yerli torpaq sahiblərinə müxtəlif kənd təsərrüfatı texnikasının lizinqlə alınması və verilməsi yolu ilə ölkədə sahibkarlığa dəstəyin göstərilməsidir.
Hazırda ASC, işğal olunmuş əraziləri çıxmaq şərtilə, Azərbaycanın bütün rayonlarında 9 regional aqroservis təchizat bazasına və 50-dən çox aqroservis fiallara malikdir.
