Azərbaycan, Bakı, 12 aprel /Trend, müxbir N.İsmayılova/
Azərbaycan banklarının valyuta əməliyyatlarının "Bloomberg"in platformasına köçürülməsi ölkənin valyuta bazarı infrastukturunun müasir standartlara uyğunlaşdırılması üzrə addımdır. Bu barədə jurnalistlərə çərşənbə axşamı Azərbaycan Mərkəzi Bankının (AMB) sədr müavini Aftandil Babayev deyib.
"Bloomberg" platforması vasitəsilə əməliyyatların aparılması "online" rejimdə dünya maliyyə bazarlarındakı vəziyyəti, eləcə də məzənnənin dəyişməsini izləməyə imkan verir. AMB əvvəllər manatın məzənnəsinin ikitərəfli hədəfləmə siyasətinə keçib. Bu, bazarda baş verən proseslərə əsaslanır. Bankların əməliyyatlarının "Bloomberg"in platformasına köçürülməsi bazar agentlərinə vəziyyəti "оnline" rejimdə izləməyə və müasir texniki infrastuktur vasitəsilə bu dəyişikliklərin dinamikasını nəzərə almağa imkan verir", - Babayev qeyd edib.
Onun sözlərinə görə, keçid qısa müddətdə - bir neçə ay ərzində həyata keçiriləcək.
"İndi banklar bu sistemə adaptasiya rejimində işləyirlər, lakin tezliklə sistemin tam rəsmiləşdirilməsi və müqavilələrin bağlanması həyata keçiriləcək", - o əlavə edib.
Sədr müavininin sözlərinə görə, bu addım Bakı Banklararası Valyuta Birjasının (BVB) fəaliyyətinə təsir göstərməyəcək.
"AMB mütəşəkkil pul bazarını dəstəkləyir. Əlbəttə, valyuta əməliyyatlarının "Bloomberg"in platformasına köçürülməsi yeni rəqabət mühiti yaradacaq və BBVB yeni xidmət və məhsullar təqdim etməyə çalışacaq, buna görə demək olmaz ki, bu stuktura ehtiyac olmayacaq", - Babayev qeyd edib.
