Azərbaycan, Bakı, 23 aprel /Trend, müxbir A.Axundov/
Azərbaycan Sığortaçılar Assosiasiyasının Müşahidə Şurasının sədri Azər Əliyev ASA-nın icraçı direktoru təyin olunub. Bu barədə Trend-ə şənbə günü Əliyev özü məlumat verib. Bu qərar ASA-nın cümə günü keçirilən təsisçilər yığıncağında qəbul edilib.
Onun sözlərinə görə, assosiasiyanın Müşahidə Şurasının yeni sədrinin seçilməsi məsələsinə gələn həftə baxılacaq.
ASA-nın Müşahidə Şurasına 5 sığorta şirkəti - Beynəlxalq Sığorta Şirkəti, "Azərsığorta" Dövlət şirkəti, "Atəşgah" sığorta şirkəti, "Standard Insurance" və AXA MBASK daxildir.
Əvvəllər ASA-nın icraçı direktoru vəzifəsini Qafar Məcidov tutub. Bundan əvvəl Trend-ə Məcidovun dediyinə görə, onun namizədliyi "Ata Sığorta" şirkətinin açmağa planlaşdırdığı həyat sığortası üzrə yeni şirkətin idarə heyətinin sədri vəzifəsinə irəli sürülüb. O, Maliyyə Nazirliyi yanında Dövlət Sığorta Nəzarəti Xidmətinin rəhbər vəzifə üçün keçirdiyi imtahandan müvəffəqiyyətlə çıxıb.
2006-cı il dekabrın 29-da əsası qoyulan və 28 üzvü birləşdirən assosiasiyanın əsas məqsədi Azərbaycanda fəaliyyət göstərən sığorta şirkətlərinin, eləcə də təkrar sığorta şirkətlərinin inkişafına kömək göstərməkdən, onların sosial-iqtisadi, informasiya və digər proqramlarının inkişafı, göstərilən sahələrdə onların biliklərinin artırılmasından ibarətdir.
Azərbaycanda 28 sığorta və bir təkrar sığorta şirkəti fəaliyyət göstərir.