İran Parlamentinin Tədqiqat Mərkəzinin (Research Center) rəhbəri Əhməd Təvəkküli (Ahmad Tavakkoli) parlament nümayəndələrinə ünvanladığı açıq məktubda bildirib ki, iqtisadi məlumatları gizli saxlamaq üçün Əhmədinejad hakimiyyəti tərəfindən İran Statistika Mərkəzi və Mərkəzi Banka təzyiq olunur. Trend-in məlumatına görə, bu barədə Təvəkküliyə bağlı /alef.ir/ xəbər saytı məlumat yayıb.
Təvəkküli bildirib ki, Mərkəzi Bank sonuncu dəfə 2008-ci ilin ikinci yarısında ölkənin ÜDM-i ilə bağlı statistika açıqlayıb. 2010-cu ilin yazından nə Mərkəzi Bank və nə də Statistika Mərkəzi işsizliklə bağlı statistikaları yaymır.
İran Prezidenti bildirib ki, keçən il (İranda il martın 21-də dəyişir) ölkədə 1,6 milyon yeni iş yeri açılıb və cari ildə 2,5 milyon yeni iş yeri açılacaq.
İranda ildə bir milyona yaxın gənc əmək yaşına çatır və rəsmi statistikalara əsasən, bir yeni iş yerinin yaradılması üçün orta hesabla 20-60 min dollar vəsait lazımdır.
Təvəkküli hesab edir ki, ölkənin iqtisadi vəziyyəti nəzərə alınsa, 1,6 milyon yeni iş yerinin açılması inandırıcı deyil.
Onun sözlərinə görə, ÜDM-in artımı ilə işsizlik arasında əks-mütənasiblik var. ÜDM-in statistikasının üç il müddətində açıqlanmaması göstərir ki, artım yoxdur. Buna görə də, bir ildə 1,6 milyon yeni iş yerinin yaradılması tamamilə şübhəlidir.
1997-2005 illərdə Məhəmməd Xatəminin prezidentlik dövründə orta hesabla illik 5 faiz iqtisadi inkişafla ildə 600 min yeni iş yeri yaradılıb.
Təvəkküli Beynəlxalq Valyuta Fondunun statistikalarına əsasən bildirib ki, İranda iqtisadi inkişaf 2009-cu ildə 0,1 faiz, 2010-cu ildə 1 faiz olub, 2011-ci ildə isə bu göstərici sıfıra bərabər olacaq.
Onun sözlərinə görə, İran Beynəlxalq Valyuta Fondunun üzvüdür və fonda iqtisadi inkişafla bağlı statistikaları vermyə məcburdur.
İran Statistika Mərkəzi 2009-cu ilin yaz mövsümündə işsizliyin səviyyəsinin 14,6 faiz təşkil etdiyini bildirmişdi, lakin İranın əmək və ictimai işlər naziri Əbdülrza Şeyxülislami martın sonunda prezident Mahmud Əmədinejadın sözlərinə istinadən bildirmişdi ki, ölkədə işsizlik 10 faizdir.
Təvəkküli bildirib ki, 2004-2007-ci ilədək Prezident Administrasiyasının nəzdində fəaliyyət göstərən Proqramlaşdrma və Nəzarət üzrə İdarənin (President Deputy strategic Planing and control) yaydığı statistikalara görə, hər il ölkədə orta hesabla 6,63 faiz iqtisadi inkişafa nail olunub və ildə 764,633 min yeni iş yeri açılıb.
İranda həftədə bir saat işləyənlər, tələbələr və əsgərlər də işləyənlər siyahısına salınır. Beynəlxalq standardlara görə, iş sahibi həftədə minimum 48 saat işləməlidir.
