Azərbaycan, Bakı, 14 may /Trend, müxbir A.Axundov/
İngiltərə-Azərbaycan birgə sığorta şirkəti Temzа Sığorta Qrupu 2011-ci ilin sonunadək bir milyon manat həcmində mükafat toplamağı planlaşdırır. Bu barədə Trend-ə şirkətin idarə heyətinin sədri Samir Mustafayev şənbə günü məlumat verib.
Azərbaycan Maliyyə Nazirliyi yanında Dövlət Sığorta Nəzarəti Xidmətinin məlumatına görə, şirkət 2010-cu ildə 0,83 milyon manat məbləğində mükafat toplayıb, 0,44 milyon manat həcmində ödəniş həyata keçirib. 2011-ci ilin yanvar-aprel aylarında şirkət 0,27 milyon manat sığorta haqqı toplayıb, 29 min manat həcmində ödəniş edib.
Mustafayevin sözlərinə görə, nizamnamə kapitalının artırılması planları var, yeni maliyyə mənbələrinin axtarışı aparılır.
"Lakin bu çərçivədə başqa şirkətlə birləşməyin mümkünlüyü məsələsinə baxılmır", - o deyib.
Onun sözlərinə görə, şirkətin kapitalı yeni səhmdarın - Azərbaycan rezidenti olan bir fiziki şəxsin hesabına artırıla bilər. Onun Britaniyanın "Glencarron Group Limited" şirkətinin payını alacağı halda bu, baş tuta bilər.
"Məsələ ilə bağlı danışıqlar aparılır", - Mustafayev bildirib.
Nizamnamə kapitalında 49 faizlik iştirak payına Britaniyanın "Glencarron Group Limited" şirkətinin malik olduğu "Temzа Sığorta Qrupu" sığorta şirkəti Azərbaycanın sığorta bazarında 1996-cı ildən fəaliyyət göstərir. Azərbaycanın iştirak payı yerli fiziki şəxs və hüquqi şəxsə (Gala Investment) məxsusdur. Şirkətin nizamnamə kapitalı 0,9 milyon manat təşkil edir.
Ötən il Azərbaycan Maliyyə Nazirliyinin qərarına əsasən, sığortaçı kapitalına minimum tələb 2011-ci il yanvarın 1-nə 3,5 milyon manat (təkrar sığorta şirkətləri üçün 7 milyon manat), 2012-ci il yanvarın 1-nə 5 milyon manat (10 milyon manat) həcmində planlaşdırılıb.
Sığorta və təkrar sığorta şirkətlərinin kapitalına olan minimum tələb haqqında qərarın qəbul olunması zamanı dünya maliyyə böhranının biznes sığorta və təkrar sığorta şirkətlərinə təsiri nəzərə alınıb, ölkənin sığorta bazarının inkişaf dinamikasına təsir təhlil edilib.
Mayın 14-nə rəsmi məzənnə 0,7908 AZN/USD təşkil edir.
