Azərbaycan, Bakı, 18 may /Trend, müxbir N.İsmayılova/
Mayın 18-də Bakıda "Alliance Factors" şirkəti "roadshow" keçirib. Tədbir çərçivəsində "Alliance" 7.0 və SWIFTNet 7.0 ailəsinin məhsullarının yeni imkanları təqdim olunub.
"2011-ci ilin əvvəlində SWIFT 7.0-ın təkmilləşdirilmiş versiyasını təqdim etdiyindən, Azərbaycan bankları bu versiyanın məhsullarının miqrasiya məsələlərinə başlamalıdırlar", - "Alliance Factors" şirkətinin nümayəndəsi Vasili Lukaşin təqdimat zamanı deyib.
Onun sözlərinə görə, yeni versiyaya keçid 2012-ci il martın 31-dək başa çatmalıdır, çünki sonradan əvvəlki versiyaların dəstəklənməsi dayandırılacaq. 6.0 və 6.3 versiyasından istifadə edən banklar üçün 7.0 versiyasına birbaşa keçid mümkündür. Aralıq 6.2 versiyasından istifadə edən banklar üçün əvvəlcə 6.3 versiyasına, sonradan 7.0 versiyasına keçmək lazımdır.
Lukaşinin sözlərinə görə, versiyaların dəyişdirilməsi servisin və təhlükəsizliyin təkmilləşdirilməsi ilə yanaşı, Dial-up X25 qoşulma, USE/ BKE SWIFTNet Phase 2 Migration, Asynchronous and terminal devices kimi əməliyyatların dəstəklənməsinin dayandırılmasına səbəb olacaq.
"Banklar artıq bu gün miqrasiya metodları barədə fikirləşməyə başlamalıdırlar, çünki yeni versiyaya keçidə çoxlu vaxt lazım olacaq", - o qeyd edib.
"Alliance Factors" şirkəti SWIFT-in MDB, Baltikyanı və Monqolustan ərazisində rəsmi tərəfdaşdır və miqrasiya prosesinə hazırlığa dəstək göstərir", - Lukaşin bildirib.
Banklar onu da nəzərə almalıdırlar ki, 7.0 versiyasına keçid dövründə SWIFT şəbəkəsindən istifadənin dayandırılması tələb olunacaq.
Nəzərdə tutulan servisə və işin keyfiyyətinə daima SWIFT tərəfindən nəzarət edilir. Şirkət "Alliance", xüsusilə SWIFT-in dəstəklədiyi Microsoft Windows, SUN Solaris, IBM AIX platformalarda Alliance Access, Alliance Entry, Alliance Gateway ailəsinin proqram məhsullarının quraşdırılması, sazlanması və istismarı ilə bağlı işlərin aparılmasına səlahiyyətlidir.
SWIFT (Society for Worldwide Interbank Financial Telecommunication) - 1973-cü ildən maliyyə telekommunikasiya sahəsində işləyən beynəlxalq təşkilatdır. Dünyanın 209 ölkəsinin 9000-dən çox bank, maliyyə təşkilatları və korporasiyaları SWIFT şəbəkəsindən standartlaşdırılmış maliyyə məlumatlarının mübadiləsi üçün istifadə edirlər. Hazırda SWIFT öz şəbəkəsi üzrə istifadəçilər arasında məlumatların ötürülməsinə görə maliyyə məsuliyyəti daşıyan yeganə təşkilatdır. Hər il SWIFT vasitəsilə 2,5 milyard ödəniş tapşırıqları keçir.
