Azərbaycan, Bakı, 10 iyun /Trend, müxbir A.Axundov/
Sığortaçılarla qiymətləndiricilər arasında qarşılıqlı əlaqələr çox aşağı səviyyədədir. Azərbaycan Sığortaçılar Assosiasiyasının icraçı direktoru Azər Əliyev bu qənaətdədir.
"Demək olmaz ki, hazırkı qiymətləndirmə sistemi ölkədə sığortanın inkişafına mane olur. Lakin sığortaçılarla qiymətləndiricilər arasındakı qarşılıqlı əlaqələr çox aşağı səviyyədədir, demək olar, mövcud deyil", - Əliyev cümə günü Trend-ə bildirib.
Onun sözlərinə görə, sığortaçılar qiymətləndirmə məsələlərini öz gücləri ilə həll edirlər.
"Qiymətləndiricilər isə sığortaçıların öz müştərilərinin sıralarına cəlb edilmələri üçün heç bir fəallıq göstərmirlər", - Əliyev bildirib.
Onun sözlərinə görə, Azərbaycanda sığortada qiymətləndiricilərin fəaliyyəti ilə bağlı vəziyyətin yaxşılaşdırılması üçün ilk növbədə qiymətləndiricilərin və sığortaçıların peşəkarlıq səviyyəsinin artırılması vacibdir.
Bir müddət əvvəl Azərbaycan Maliyyə Nazirliyi yanında Dövlət Sığorta Nəzarəti Xidmətinin rəhbəri Namiq Xəlilovun dediyi kimi, Azərbaycanda sığorta müqaviləsi bağlanan zaman dəymiş ziyanın məbləğinin qiymətləndirilməsi və sığorta edilən obyektin dəyərinin müəyyənləşdirilməsi vahid standartlar üzrə aparılmalıdır.
Onun sözlərinə görə, sığortaçılar və peşəkar sertifikatlaşdırılmış qiymətləndiricilərin əməkdaşlığı zəruridir və böyük perspektivlərə malikdir.
Milli Məclisin deputatı Vahid Əhmədovun sözlərinə görə, sığortada qiymətləndirmənin başlıca problemi müstəqil qiymətləndirmənin olmamasıdır.
"Sığorta halı yaranan zaman sığorta şirkətləri dəymiş ziyanın həcmini özləri qiymətləndirirlər və bəzən bu qiymətləndirmə reallıqdan aşağı olur", - Əhmədov bildirib.
Bundan əvvəl parlamentin İqtisadi siyasət komitəsinin sədri Ziyad Səmədzadənin Trend-ə dediyinə görə, iyunun sonunda üçüncü oxunuşda müzakirəsi gözlənilən "Sığortanın icbari növləri haqqında" qanun layihəsində daşınmaz əmlak qiymətləndiricilərinə qarşı tələblərin sərtləşdirilməsi təklif edilir.
"Qanun layihəsində, xüsusilə də daşınmaz əmlak maddəsi üzrə ciddi dəyişikliklər gözlənilir. Mühüm məsələ sığortaya verilən əmlakın real ekspert qiymətləndirməsidir", - Səmədzadə bildirib.
Onun sözlərinə görə, Azərbaycanda müasir qiymətləndiricilər və bu sahədə müvafiq təcrübə yoxdur.
"Dünyada əmlakın qiymətləndirilməsi üzrə müasir metodologiya, müvafiq normativlər var. Onlar qiymətləndirilən zaman 2-3 faizlik yanlışlıq yarana bilər. Azərbaycanda isə bir bina bir neçə ekspert tərəfindən qiymətləndirilə bilər, onların qiymətləndirmələri isə bir-birindən çox fərqlənir", - Səmədzadə qeyd edib.
Səmədzadənin sözlərinə görə, buna görə də "Sığortanın icbari növləri haqqında" qanun layihəsində qiymətləndiricilərə qarşı sərt tələblər irəli sürüləcək. Onlardan biri qiymətləndirmə fəaliyyətini həyata keçirmək üçün sertifikatın alınması olacaq.
"Sertifikatları Əmlak Məsələləri Dövlət Komitəsi, yaxud özəl şirkətlər verəcək. Xaricdə bununla özəl şirkətlər məşğul olur", - Səmədzadə əlavə edib.
"Sığortanın icbari növləri haqqında" qanun layihəsi ikinci oxunuşda qəbul edilib və indi təkliflər nəzərə alınmaqla xüsusi komissiya tərəfindən tamamlanır.
