Azərbaycan, Bakı, 23 iyun /Trend, müxbir A.Axundov/
Azərbaycan Lizinq Şirkətləri Assosiasiyası (ALCA) qanunvericilikdə əlavə və dəyişikliklərin edilməsi üzrə təkliflərin müzakirə edilməsi ilə əlaqədar yaxın vaxtlarda bazarda fəaliyyət göstərən bütün lizinq şirkətlərinin iştirakı ilə görüşməyi planlaşdırır. Bu barədə Trend-ə cümə axşamı assosiasiyanın rəhbəri Elçin Əhmədov məlumat verib.
"Bu görüşdə məqsəd assosiasiyanın hazırladığı təklifləri lizinq bazarının bütün oyunçuları ilə müzakirə etmək, daha sonra ümumiləşdirilmiş təkliflərlə hökumətə müraciət etməkdir", - Əhmədov deyib.
Onun sözlərinə görə, iyulun əvvəlində ALCA hökumətə müraciətin hazırlanmasını başa çatdırmağı planlaşdırır. Hökumətin rəyini aldıqdan sonra lizinq bazarının hansı formada - Mülki Məcəllə və ya lizinq haqqında ayrıca qanun vasitəsilə tənzimlənəcəyi barədə yekun qərar qəbul ediləcək.
"Bu gün bazarda xüsusi qızğın artım müşahidə olunmur ki, bu da qanunvericilikdəki boşluqlarla bağlıdır, lakin ümumilikdə vəziyyət normallaşır", - Əhmədov bildirib.
2010-cu il yanvarın 1-nə ölkədə lizinq portfelinin həcmi 187 milyon dollar təşkil edib ki, bu, 2009-cu ildə 208 milyon, 2008-ci ildə isə 209 milyon dollar səviyyəsində olub. Assosiasiyanın rəhbəri bu ilin yekunları üzrə lizinq portfelinin 250-300 milyon dollaradək artacağını ("Aqrolizinq" dövlət lizinq şirkətinin portfeli nəzərə alınmadan) gözləyir.
Azərbaycanın lizinq bazarı 22 lizinqverənlə təmsil olunur, lakin bu gün lizinq xidmətləri göstərən 11 şirkət və bank aktiv fəaliyyət göstərir.
Bu gün assosiasiyanın 9 tamhüquqlu üzvü və iki müşahidəçi üzvü var.
Assosiasiya 2004-cü il oktyabrın 27-də "Ataleasing", "Unileasing" və "Muganleasing" şirkətləri tərəfindən təsis edilib.
Assosiasiyanın üzvləri bunlardır: Joint Leasing AG Leasing, AtaLeasing, DəmirBank, Bank of Baku, Credagro, UniLeasing, Standard Leasing, Qafqaz Leasing, müşahidəçi kimi isə ASB Bank və Nikoil Leasing.